’جے ڈی اے کی۱۶ ہزار کنال سے
زائد اراضی پر قبضہ‘ بے دخلی مہم جاری‘
جموں؍۲؍اپریل
جموں و کشمیر کے وزیر اعلیٰ عمر عبداللہ نے جمعرات کو کہا کہ جموں ڈیولپمنٹ اتھارٹی(جے ڈی اے ) کی۱۶ ہزار کنال سے زائد اراضی اس وقت ناجائز قبضے میں ہے اور اس کے خلاف مرحلہ وار اور مقررہ مدت کے تحت بے دخلی مہم چلائی جا رہی ہے۔
اسمبلی میں بی جے پی کے رکن اسمبلی ڈاکٹر نریندر سنگھ رینا کے سوال کے جواب میں وزیر اعلیٰ نے بتایا کہ جے ڈی اے کے زیر انتظام کل اراضی۸۰ہزار۹۷۶کنال اور۱۰ مرلہ ہے، جس میں سے۱۶ہزار۱۲۷کنال اور۱۰مرلہ غیر قانونی قبضے میں ہے۔
عمرعبداللہ نے وضاحت کی کہ تجاوزات کی نشاندہی فیلڈ عملے کے معائنے اور محکمہ ریونیو کے ریکارڈ کی بنیاد پر کی جاتی ہے۔
وزیر اعلیٰ نے کہا’’جموں و کشمیر پبلک پریمیسز (غیر مجاز قابضین کی بے دخلی) ایکٹ کے تحت نوٹس جاری کیے جاتے ہیں اور ضلع انتظامیہ و پولیس کے اشتراک سے باقاعدہ بے دخلی اور انہدامی کارروائیاں انجام دی جاتی ہیں‘‘۔
عمرعبداللہ نے مزید کہا کہ نئی تجاوزات کو روکنے کے لیے باقاعدہ فیلڈ معائنہ کیا جاتا ہے اور غیر قانونی قابضین کے خلاف کارروائی قانونی تقاضوں کے مطابق مرحلہ وار اور مقررہ وقت میں کی جا رہی ہے۔
قبضہ کرنے والوں کی تفصیلات، مثلاً آیا وہ سیاستدان، بیوروکریٹس، نجی افراد یا ادارے ہیں، کے بارے میں وزیر اعلیٰ نے کہا کہ جے ڈی اے اس نوعیت کی درجہ بندی کے ساتھ ریکارڈ نہیں رکھتا۔
وزیر اعلیٰ نے کہا’’قبضہ کرنے والوں کی فہرستیں محکمہ ریونیو سے حاصل ہوتی ہیں اور انہیں زمین یا مقام کی بنیاد پر رکھا جاتا ہے‘‘۔انہوں نے اس بات پر زور دیا کہ تمام کارروائیاں شفافیت اور جوابدہی کو یقینی بنانے کے لیے سختی سے قانونی ضوابط کے مطابق کی جاتی ہیں۔
