دھونی کی پنڈلی میں کھنچاؤ، آئی پی ایل 2026 کے ابتدائی دو ہفتوں کے لئے باہر

چنئی، 28 مارچ (یو این آئی)عظیم کرکٹر مہندر سنگھ دھونی پنڈلی میں کھنچاؤ کے سبب آئی پی ایل 2026 کے ابتدائی دو ہفتوں کے لئے باہر ہو گئے ہیں۔
چنئی سپر کنگ نے ایک مختصر بیان میں کہا ہے کہ دھونی اس وقت ریہیبلیٹیشن (علاج اور بحالی) کے مرحلے سے گزر رہے ہیں، جس کی وجہ سے وہ سیزن کے پہلے دو ہفتوں میں میدان میں نظر نہیں آئیں گے۔
یہی وہ دھونی ہیں جنہوں نے سی ایس کے کو 2010، 2011، 2018، 2021 اور 2023 میں پانچ آئی پی ایل خطابات دلائے، انہوں نے اپنی ٹیم کی قیادت کرتے ہوئے یہ تمام ٹائٹل جیتے۔
سی ایس کے، جو گزشتہ دو سیزنز (2024 اور 2025) میں پوائنٹس ٹیبل میں سب سے نیچے رہی، اس بار بہتر کارکردگی کی امید کر رہی ہے۔ تاہم دھونی کی انجری نے ٹیم کے لیے تشویش پیدا کر دی ہے، کیونکہ ان کا تجربہ اور رہنمائی ٹیم کے لیے بے حد اہم ہے۔
سی ایس کے اپنے 2026 سیزن کا آغاز گوہاٹی میں راجستھان رائلز کے خلاف کرے گی، جبکہ پہلا ہوم میچ 3 اپریل کو تاریخی ایم اے چدمبرم اسٹیڈیم میں پنجاب کنگز کے خلاف ہوگا۔
دھونی کی غیر موجودگی میں وکٹ کیپنگ کی ذمہ داری ممکنہ طور پر سنجو سیمپسن سنبھال سکتے ہیں، جو کپتان رُتوراج گائیکواڑ کے ساتھ اننگز کا آغاز کریں گے۔
دھونی نے اب تک 278 آئی پی ایل میچز میں 5,439 رنز بنائے ہیں، جن میں 24 نصف سنچریاں شامل ہیں اور ان کا زیادہ سے زیادہ اسکور 84 رہا ہے۔