بی سی سی آئی کا بڑا فیصلہ: میچ کے دن پریکٹس سیشنز پر پابندی

ممبئی، 23 مارچ(یواین آئی ) ہندوستانی کرکٹ کنٹرول بورڈ (بی سی سی آئی) نے کھلاڑیوں کی سہولت اور گراؤنڈ مینجمنٹ کو بہتر بنانے کے لیے پریکٹس سیشنز کے حوالے سے نئے اور سخت قواعد و ضوابط جاری کر دیے ہیں۔ ان نئے رہنما خطوط کے تحت اب میچ کے دنوں میں کسی بھی ٹیم کو پریکٹس (مشق) کرنے کی اجازت نہیں ہوگی۔
بی سی سی آئی نے ممبئی کے وانکھیڑے اسٹیڈیم میں پریکٹس کے لیے ایک منفرد انتظام کیا ہے۔مرکزی پچ کے دونوں اطراف ہر ٹیم کو دو دو پریکٹس وکٹیں فراہم کی جائیں گی۔ کسی بھی ٹیم کو حریف ٹیم کے لیے مختص کردہ پریکٹس وکٹ استعمال کرنے کی اجازت نہیں ہوگی۔
ٹیموں کو پریکٹس ایریا میں 2 نیٹ ملیں گے، جبکہ مرکزی پچ کے قریب ایک وکٹ خصوصی طور پر ‘رینج ہٹنگ’ (بڑے شاٹس کی مشق) کے لیے دی جائے گی۔
ٹیم مینیجرز کو بھیجے گئے آفیشل نوٹ کے مطابق اگر دونوں ٹیمیں ایک ہی وقت میں پریکٹس کر رہی ہوں، تو ہر ٹیم کے پاس صرف 2-2 وکٹیں ہوں گی۔ اسٹیڈیم میں ‘اوپن نیٹ’ (بغیر نیٹ کے مشق) کی ہرگز اجازت نہیں دی جائے گی۔ اگر کوئی ٹیم اپنا سیشن وقت سے پہلے ختم کر لیتی ہے، تب بھی دوسری ٹیم ان خالی وکٹوں کو استعمال نہیں کر سکے گی۔ میچ والے دن کسی بھی قسم کا باقاعدہ پریکٹس سیشن منعقد نہیں کیا جا سکے گا۔ان اقدامات کا مقصد پچ کی حفاظت کو یقینی بنانا اور دونوں ٹیموں کو مشق کے لیے یکساں اور شفاف مواقع فراہم کرنا ہے۔