نئی دہلی، 24 فروری (یو این آئی) وزیراعظم نریندر مودی نے آج تمل ناڈو کی سابق وزیراعلیٰ آنجہانی جے جے للیتا کو ان کے یوم پیدائش کے موقع پر صمیم قلب سے خراج عقیدت پیش کیا۔ وزیر اعظم نے انہیں قدآور رہنما اور ممتاز منتظم کے طور پر یاد کیا، جنہوں نے لوگوں کےدل و دماغ پر انمٹ نقوش ثبت کئے۔
مسٹر مودی نے تمل ناڈو کی وزیراعلیٰ کی حیثیت سے جے جے للیتا کے انقلابی دور حکومت کا ذکر کرتے ہوئے کہا کہ انہوں نے خواتین کو بااختیار بنانے، سماجی انصاف اور جامع ترقی پر مضبوط توجہ مرکوز رکھتے ہوئے فلاحی طرزِ حکمرانی کی بھرپور حمایت کی۔
وزیراعظم نے ان کے ساتھ ہونے والی اپنی ملاقاتوں کو نہایت مسرت اور عقیدت کے ساتھ یاد کیا۔ مسٹر مودی نے اس ماہ کے ‘من کی بات’ پروگرام میں بھی ان کی زندگی اور خدمات کے بارے میں اپنے خصوصی خیالات کا اظہار کیا۔
وزیراعظم نے ایکس پر لکھا’’ جے جے للیتا جی کے یوم پیدائش پر انہیں یاد کر رہا ہوں۔ انہوں نے ایک قدآور رہنما اور شاندار منتظم کے طور پر بے شمار لوگوں کے دلوں اور ذہنوں میں اپنی جگہ بنائی۔ ان کی زندگی عزم و ہمت سے بھرپور تھی۔ تمل ناڈو کی وزیراعلیٰ کی حیثیت سے انہوں نے خواتین کو بااختیار بنانے، سماجی انصاف اور جامع ترقی پر خصوصی توجہ دیتے ہوئے فلاحی حکمرانی کی قیادت کی۔ وہ ہمدرد بھی تھیں اور فیصلہ کن بھی۔ ان کے ساتھ اپنی ملاقاتوں کو یاد کرکے مجھے بے حد خوشی ہوتی ہے۔ ’’اس ماہ کے #MannKiBaat پروگرام میں بھی میں نے ان کے بارے میں یہی کہا تھا‘۔
