نئی دہلی، 24 فروری (یو این آئی)
نجی فضائی کمپنی انڈیگو نے منگل کے روز اپنی محدود مدت کی سیل اسپلش انٹو سیونگز پیش کی ہے، جس میں منتخب ملکی (ڈومیسٹک) روٹس پر تمام ٹیکسز سمیت یکطرفہ کرایہ 1,999 روپے سے شروع ہوگا یہ سیل 24 فروری سے 27 فروری تک کی جانے والی بکنگ پر، رواں سال 03 مارچ سے 30 ستمبر تک کے سفر کے لیے کارآمد ہوگی۔ بکنگ سفر کی تاریخ سے کم از کم سات دن پہلے کرانی لازمی ہوگی۔ یہ پیشکش نان اسٹاپ اور کنیکٹنگ پروازوں کے لیے بھی دستیاب ہے۔
‘اسپلش انٹو سیونگز کے تحت ملکی روٹس پر یکطرفہ کرایہ 1,999 روپے سے اور بین الاقوامی روٹس پر 4,699 روپے (تمام ٹیکسز سمیت) سے شروع ہوگا۔ منتخب ملکی روٹس پر انڈیگو اسٹریچ کے کرایے 9,999 روپے سے دستیاب ہیں۔
کرایوں کے علاوہ، سیل کی مدت کے دوران منتخب اضافی سہولیات پر بھی رعایت دی جا رہی ہے۔ ان میں فاسٹ فارورڈ سروسز پر 70فیصد تک کی چھوٹ شامل ہے۔ پری پیڈ اضافی سامان پر 50فیصد تک اور منتخب ملکی و بین الاقوامی سیکٹرز میں اسٹینڈرڈ سیٹ کے انتخاب پر 15فیصد تک کی رعایت دستیاب ہے۔ اضافی لیگ روم والی نشستیں منتخب ملکی روٹس پر 500 روپے میں بک کرائی جا سکتی ہیں۔ مزید برآں، دو سال تک کے شیر خوار بچے ملکی سیکٹرز میں صرف ایک روپے میں سفر کر سکتے ہیں، بشرطیکہ بکنگ براہِ راست انڈیگو کے چینلز کے ذریعے کی گئی ہو۔
