جدید کرکٹ کے دباؤسے ٹیسٹ فارمیٹ متاثر ہو رہا ہے: راہل دراوڑ

بنگلورو،28 جنوری (یواین آئی )ہندوستان کے سابق کپتان اور سابق ہیڈ کوچ راہل دراوڑ نے جدید دور کی مصروف کرکٹ اور ٹیسٹ فارمیٹ میں بلے بازوں کی گرتی ہوئی کارکردگی کے حوالے سے اہم انکشافات کیے ہیں۔ بنگلور میں روہت شرما پر لکھی گئی کتاب ‘دی رائز آف ہٹ مین’ کی تقریبِ رونمائی کے موقع پر انہوں نے ہندوستانی بلے بازوں کی موجودہ صورتحال کا گہرا تجزیہ پیش کیا۔ راہل دراوڑ نے کہا ہے کہ جو بلے باز تینوں فارمیٹس کھیلتے ہیں، انہیں ریڈ بال (ٹیسٹ) کرکٹ کی تیاری کے لیے مناسب وقت نہیں مل پا رہا، جس کی وجہ سے ٹیسٹ میں کمزوریاں سامنے آ رہی ہیں۔دراوڑ کے مطابق کھلاڑی مسلسل ایک فارمیٹ سے دوسرے فارمیٹ میں مصروف رہتے ہیں اور کئی بار ایسا ہوتا ہے کہ ٹیسٹ میچ سے کچھ دن پہلے ہی تیاری شروع ہوتی ہے، جبکہ بعض بلے باز مہینوں سے لال گیند سے نہیں کھیلے ہوتے۔
انہوں نے کہا کہ پہلے صرف دو فارمیٹس ہوتے تھے، اس لیے ٹیسٹ سیریز سے قبل بھرپور تیاری کا وقت ملتا تھا، جو اب ممکن نہیں رہا۔ٹیسٹ کپتان شبھمن گل بھی یہ بات کہہ چکے ہیں کہ کھلاڑیوں کو ٹیسٹ سیریز کی تیاری کے لیے مزید وقت دیا جانا چاہیے۔
دراوڑ نے کہا کہ ہندوستان ٹی20 میں اس لیے مضبوط ہے کیونکہ کھلاڑی آئی پی ایل جیسے ٹورنامنٹس میں شارٹ فارمیٹ کی زیادہ مشق کرتے ہیں، جبکہ ٹیسٹ میں بہتری کی ضرورت ہے۔کھلاڑی آئی پی ایل میں ڈھائی ماہ صرف چھکے مارنے کی پریکٹس کرتے ہیں، جس سے ان کی ہٹنگ پاور تو بہتر ہوئی ہے لیکن دفاعی تکنیک کمزور ہو رہی ہے۔
انہوں نے یہ بھی بتایا کہ ورلڈ ٹیسٹ چیمپئن شپ کے دباؤ کی وجہ سے دنیا بھر میں گیند بازوں کے حق میں پچیں بن رہی ہیں، جس سے بلے بازوں کو مزید مشکلات پیش آ رہی ہیں۔ آئی سی سی مردوں کے ٹی20 ورلڈ کپ میں اپنے اعزاز کا دفاع کرنے سے قبل ہندوستان کو بڑا حوصلہ ملا ہے، کیونکہ نیوزی لینڈ کے خلاف جاری سیریز میں شاندار کارکردگی کے بعد ہندوستانی کھلاڑیوں نے تازہ ترین آئی سی سی ٹی20 رینکنگ میں نمایاں ترقی حاصل کی ہے۔
آئی سی سی کے مطابق اوپنر ابھشیک شرما نے ٹی20 بیٹنگ رینکنگ میں اپنی پہلی پوزیشن مزید مضبوط کر لی ہے۔ سیریز کے ابتدائی تین میچوں میں دو نصف سنچریوں کی بدولت ان کے ریٹنگ پوائنٹس بڑھ کر 929 ہو گئے ہیں۔ انگلینڈ کے فل سالٹ دوسرے اور تلک ورما تیسرے نمبر پر موجود ہیں۔
سابق نمبر ون بیٹر سوریہ کمار یادیو نے بھی ترقی کرتے ہوئے پانچ درجے بہتری کے ساتھ ساتویں پوزیشن حاصل کر لی، جبکہ بولنگ میں جسپریت بمراہ چار درجے بہتری کے بعد 13ویں نمبر پر پہنچ گئے۔ ورون چکرورتی بدستور ٹی20 بولرز میں سرفہرست ہیں۔
آل راؤنڈرز میں ہاردک پانڈیا تیسری اور شیوم دوبے چھ درجے ترقی کے بعد 11ویں نمبر پر آ گئے ہیں، جبکہ زمبابوے کے سکندر رضا پہلی پوزیشن پر برقرار ہیں۔
دیگر ممالک کے کھلاڑیوں میں جنوبی افریقہ کے ایڈن مارکرم، ویسٹ انڈیز کے برینڈن کنگ اور نیوزی لینڈ کے گلین فلپس نے بھی رینکنگ میں نمایاں بہتری حاصل کی۔
ادھر سری لنکا اور انگلینڈ کے درمیان ون ڈے سیریز کے بعد ون ڈے رینکنگ بھی اپ ڈیٹ ہو گئی ہے، جہاں انگلینڈ کے ہیری بروک اور جو روٹ کو سب سے زیادہ فائدہ ہوا، جبکہ نیوزی لینڈ کے ڈیرل مچل بدستور ون ڈے بیٹنگ رینکنگ میں سرفہرست ہیں۔