بی بی ایل: اسٹیو اسمتھ کی طوفانی سنچری، بابر اعظم اور اسمتھ کی جوڑی نے میلہ لوٹ لیا

سڈنی، 16 جنوری ( یو این آئی) سڈنی کرکٹ گراؤنڈ (SCG) میں کھیلے گئے بگ بیش لیگ کے 37 ویں میچ میں شائقین کو عالمی معیار کی بیٹنگ دیکھنے کو ملی۔ اسٹیو اسمتھ نے لیگ کی تاریخ کی دوسری تیز ترین سنچری اسکور کر کے اپنی ٹیم سڈنی سکسرز کو فتح سے ہمکنار کروا دیا۔
میچ کا آغاز سڈنی تھنڈر کی بیٹنگ سے ہوا، جہاں تجربہ کار اوپنر ڈیوڈ وارنر نے شاندار کھیل پیش کیا۔
وارنر نے ناقابلِ شکست 110 رنز بنا کر اپنی ٹیم کا مجموعہ 6 وکٹوں کے نقصان پر 189 رنز تک پہنچا دیا۔
190 رنز کے تعاقب میں سڈنی سکسرز کی جانب سے اسٹیو اسمتھ اور پاکستان کے اسٹار بیٹر بابر اعظم بطور اوپنر میدان میں اترے۔ اسمتھ نے محض 40 گیندوں پر سنچری مکمل کی، جو بی بی ایل کی تاریخ کی دوسری تیز ترین سنچری ہے۔
بابر اعظم نے اسمتھ کا بھرپور ساتھ دیا اور 47 رنز کی ذمہ دارانہ اننگز کھیلی۔ دونوں کھلاڑیوں کے درمیان پہلی وکٹ کے لیے صرف 73 گیندوں پر 141 رنز کی دھواں دھار شراکت قائم ہوئی، جس نے میچ کا پانسہ پلٹ دیا۔سڈنی سکسرز نے مطلوبہ ہدف 18 ویں اوور میں 5 وکٹوں کے نقصان پر باآسانی حاصل کر لیا۔