ڈبلیو پی ایل میں ہرمن پریت کور کے ایک ہزار رنز مکمل

نوی ممبئی، 14 جنوری (یواین آئی )ممبئی انڈینز ویمن ٹیم کی کپتان ہرمن پریت کور نے ویمنز پریمیئر لیگ (ڈبلیو پی ایل) میں ایک ہزار رنز مکمل کر کے ایک اہم سنگِ میل عبور کر لیا ہے۔
ہرمن پریت کور نے منگل کو گجرات جائنٹس کے خلاف ڈبلیو پی ایل میچ میں ناقابلِ شکست 71 رنز کی شاندار اننگز کھیل کر یہ کارنامہ انجام دیا۔ پلیئر آف دی میچ قرار پانے والی ہرمن نے 43 گیندوں پر مشتمل اپنی اننگز میں سات چوکے اور دو چھکے لگائے۔وہ ڈبلیو پی ایل کی تاریخ میں ایک ہزار رنز مکمل کرنے والی دوسری بلے باز بن گئی ہیں۔ اس سے قبل ان کی ٹیم ساتھی نیٹ سیور برنٹ یہ اعزاز حاصل کر چکی ہیں۔ برنٹ نے 31 میچوں میں 1101 رنز اسکور کیے ہیں، جبکہ ہرمن پریت کور نے 30 میچوں میں 1016 رنز بنائے ہیں۔یہ ہرمن پریت کور کی ڈبلیو پی ایل میں دسویں نصف سنچری تھی، جس کے ساتھ ہی وہ لیگ میں سب سے زیادہ نصف سنچریاں بنانے والی بلے باز بن گئی ہیں۔ نیٹ سیور برنٹ اور میگ لیننگ نو، نو نصف سنچریوں کے ساتھ مشترکہ طور پر دوسرے نمبر پر ہیں۔