ٹرمپ کادفاعی بجٹ بڑھانے کا مطالبہ

واشنگٹن، 8 جنوری (یو این آئی) امریکی صدر ڈونلڈ ٹرمپ نے 2027 کے لیے فوجی بجٹ 1.5 ٹریلین ڈالر تک بڑھانے کا اعلان کیا ہے ۔
امریکی صدر ڈونلڈ ٹرمپ نے بدھ کو تروتھ سوشل پر ایک پوسٹ میں اعلان کیا کہ 2027 کے لیے امریکہ کا فوجی بجٹ ایک ٹریلین ڈالر سے بڑھا کر 1.5 ٹریلین ڈالر کیا جائے گا۔
ٹرمپ نے کہا کہ یہ اضافہ ہمیں "ڈریم ملٹری” بنانے کا موقع دے گا جو ہر دشمن کے مقابلے میں ملک کو محفوظ رکھے گا، انہوں نے مزید کہا کہ یہ بجٹ "بہت پریشان کن اور خطرناک اوقات” میں امریکا کو محفوظ رکھے گا۔
امریکی صدر نے بتایا کہ یہ بڑا بجٹ تقریباً تمام ممالک پر عائد کیے گئے ٹیرف سے حاصل ہونے والی آمدنی سے پورا کیا جائے گا۔
انہوں نے ٹیرف کی آمدنی کو "زبردست” قرار دیا اور کہا کہ 1.5 ٹریلین ڈالر فوج کو دینے کے بعد بھی امریکہ اپنے قرضے ادا کر سکے گا اور درمیانی آمدنی والے امریکیوں کو "ڈویڈنڈ” ادا کر سکے گا۔
یہ اعلان 2027 کے بجٹ کی منظوری کانگریس سے لینی ہوگی، اس پوسٹ سے قبل ٹرمپ نے ایک اور پوسٹ میں ڈیفنس کمپنیوں جیسے ریٹھیان پر تنقید کی کہ وہ شیئر ہولڈرز کو بڑے ڈویڈنڈ، اسٹاک بائی بیکس اور ایگزیکٹوز کو زیادہ تنخواہیں دے رہی ہیں۔
انہوں نے ان کمپنیوں کو حکم دیا کہ وہ مینوفیکچرنگ پلانٹس اور آلات میں زیادہ سرمایہ کاری کریں ورنہ سرکاری کاروبار نہیں ملے گا، اس کے علاوہ ٹرمپ کے بجٹ اعلان کے بعد ڈیفنس کمپنیوں کے اسٹاکس میں اضافہ دیکھا گیا۔ ریٹھیان کا اسٹاک تقریباً 4 فیصد اور لاک ہیڈ مارٹن کا 6 فیصد سے زیادہ بڑھ گیا ہے ۔
یہ اعلان گزشتہ ہفتے امریکہ کی طرف سے وینزوئیلا پر فوجی کارروائی کے بعد آیا ہے ، جس میں وینزویلا کے صدر نکولس مادورو اور ان کی اہلیہ کو گرفتار کر کے نیویارک لایا گیا، جہاں ان پر مقدمہ چل رہا ہے ۔ ٹرمپ نے کولمبیا، کیوبا اور میکسیکو کو بھی اسی طرح کی فوجی مداخلت کی دھمکی دی ہے ۔