‘جی رام جی اسکیم ترقی یافتہ ہندوستان کی بنیا بنے گی:یوگی

لکھنئو:6 جنوری(یواین آئی)اترپردیش کے وزیراعلیٰ یوگی آدتیہ ناتھ نے کہا ہے کہ پارلیمنٹ میں ترقی یافتہ ہندوستان کو رفتار دینے کے لیے مرکزی حکومت کی جانب سے پاس کیا گیا نیا ایکٹ (جی رام جی یوجنا) ملک کی معیشت، خاص طور پر دیہی علاقوں کے لیے سنگ میل ثابت ہوگا۔
وزیر اعلیٰ نے منگل کو پریس کانفرنس سے خطاب کرتے ہوئے کہا کہ اس اہم پہل کے لیے وہ وزیر اعظم نریندر مودی کا تہہ دل سے شکریہ ادا کرتے ہیں۔ وزیر اعلیٰ نے کہا کہ جن لوگوں نے برسوں تک وسائل پر ڈکیتی ڈال کر ملک کو بے روزگاری کی طرف دھکیلا، آج انہیں اپنی پول کھلنے کا ڈر ستا رہا ہے ۔ کانگریس اور انڈیا اتحاد ترقی سے وابستہ مثبت اقدامات کی حمایت کرنے کے بجائے بدعنوانی کے اپنے پرانے کارناموں کو چھپانے کے لیے سوالات کھڑے کر رہے ہیں۔
یوگی نے کہا کہ جی رام جی یوجنا ترقی یافتہ ہندوستان کی بنیاد بنے گی۔ اس سے دیہی معیشت کو استحکام ملے گا اور روزگار کے نئے مواقع پیدا ہوں گے ۔ اسکیم کے تحت دیہی اور شہری علاقوں میں نئی ٹیکنالوجی کو جوڑا جا رہا ہے ، جس سے تحفظِ آب، سیلاب کے انتظام اور دیہی بنیادی ڈھانچے کی ترقی ممکن ہو سکے گی۔
وزیر اعلیٰ نے منریگا پر کانگریس کے دعووں پر سوال اٹھاتے ہوئے کہا کہ جن اسکیموں کا ڈھول پیٹا جا رہا ہے ، ان کا زمینی حقیقت سے کوئی لینا دینا نہیں رہا۔ ہر ضلع سے بدعنوانی کی شکایتیں آتی تھیں۔ کسانوں کو ضرورت کے وقت مزدور نہیں ملتے تھے اور مزدوروں کو کام کے وقت کام نہیں ملتا تھا۔
انہوں نے بتایا کہ نئی ترمیم کے تحت اسکیم میں کام کے دنوں کی تعداد 100 سے بڑھا کر 125 کر دی گئی ہے ۔ وقت پر کام نہ ملنے کی صورت میں بے روزگاری بھتے کی ضمانت بھی ہوگی۔ کسانوں کی ضرورت کو مدنظر رکھتے ہوئے اہم اوقات میں منریگا کے کام روک دیے جائیں گے ۔ یوگی نے کہا کہ جو لوگ صرف کھدائی اور بھرائی سے فائدہ اٹھاتے تھے ، وہی اس اسکیم کی مخالفت کر رہے ہیں۔
اب کاموں کو ٹیکنالوجی سے جوڑا جائے گا، ڈیجیٹل ادائیگی ہوگی اورریئل ٹائم ایپ کے ذریعے نگرانی کی جائے گی۔ اسکیم کے تحت آڈٹ کا نظام بھی یقینی بنایا جائے گا۔ وزیر اعلیٰ نے الزام لگایا کہ سماجوادی پارٹی کے دورِ حکومت میں منریگا میں بڑے پیمانے پر گھپلے ہوئے ، جن کی جانچ چل رہی ہے ۔ انہوں نے کہا کہ اس اسکیم میں مرکز اور ریاست کی حصہ داری 60:40 کی رہے گی، جس سے اتر پردیش کو تقریباً 17 ہزار کروڑ روپے کی اضافی رقم مل سکے گی۔
جن ریاستوں میں مزدور طبقے کی تعداد زیادہ ہے ، انہیں زیادہ کام فراہم کیا جائے گا۔ انہوں نے کہا کہ روزگار خود انحصاری کی بنیاد بنے گا اور اس سے مستقل اثاثوں کی تعمیر ہوگی۔ اتر پردیش حکومت اس اسکیم کو پوری ایمانداری اور شفافیت کے ساتھ نافذ کرے گی۔ وزیر اعظم کے وژن کے مطابق اسے مئوثر طریقے سے زمین پر اتارا جائے گا۔
یوگی نے کہا کہ جن کی سوچ میں کبھی ترقی یافتہ ہندوستان نہیں رہا، وہی لوگ آج اس کی غلط تشہیر کر رہے ہیں، لیکن جی رام جی یوجنا ملک کی ترقی کی سمت میں ایک تاریخی قدم ثابت ہوگی۔