سرینگر/۲۷نومبر
جموں کشمیر اینٹی کرپشن بیورو (اے سی بی) نے ریاستی موٹر گراجز کے ڈائریکٹر ملک طاہر گانی کے خلاف غیر متناسب جائیداد رکھنے کے الزامات کی بنیاد پر باقاعدہ مقدمہ درج کر لیا ہے ۔
اے سی بی کے مطابق مخصوص اطلاع موصول ہونے کے بعد خفیہ سطح پر ایک تفصیلی توثیق کا عمل شروع کیا گیا، جس میں انکشاف ہوا کہ ملزم نے اپنے عہدوں کا فائدہ اٹھاتے ہوئے بھاری اثاثے جمع کیے ہیں جو اس کی جائز آمدنی سے کہیں زیادہ ہیں۔
تحقیقات سے پتہ چلا کہ ملک طاہر گانی نے مختلف محکموں اور تعیناتیوں،جن میں اے آر ٹی او اننت ناگ، پلوامہ اور ڈائریکٹر اسٹیٹ موٹر گراجز شامل ہیں-کے دوران رہائشی مکانات، پلاٹس، دکانیں، شاپنگ کمپلکس اور متعدد بینک کھاتے اپنے نام اور اپنے اہل خانہ و رشتہ داروں کے نام پر حاصل کیے ہیں۔ ابتدائی توثیق میں یہ تمام اثاثے ان کی معلوم آمدنی کے مقابلے میں انتہائی غیر متناسب پائے گئے ۔
اے سی بی نے کہا کہ دستیاب شواہد کی بنیاد پر ملزم کے خلاف انسدادِ بدعنوانی ایکٹ کی متعلقہ دفعات کے تحت پہلی نظر میں مجرمانہ بدعنوانی کا مقدمہ بنتا ہے ، جس کے بعد تھانہ اے سی بی سنٹرل میں ایف آئی آر نمبر۲۰۲۵/۱۱درج کی گئی۔
مقدمہ درج ہونے کے بعد خصوصی عدالت اینٹی کرپشن جموں سے تلاشی وارنٹ حاصل کیے گئے جس کے تحت بیورو کی ٹیموں نے چار مختلف مقامات پر چھاپے مارے ۔
ان جگہوں میں صنعت نگر سرینگر میں ان کی رہائش گاہ، حیدرپورہ سرینگر میں ایک اور گھر، گاندھی نگر جموں میں سرکاری کوارٹر اور نیوپلاٹ جموں میں ان کا سرکاری دفتر شامل ہے ۔ تلاشی کے دوران اہم اور قابلِ اعتراض مواد برآمد ہوا ہے جسے کیس کی فائل میں بطور ثبوت ضبط کر لیا گیا ہے ۔
اے سی بی کے مطابق معاملے کی مزید تفتیش جاری ہے اور مزید حقائق سامنے آنے کی توقع ہے ۔ایجنسیز
