ٹرمپ کی میئر زہران ممدانی سے ملاقات طے ہونے کی تصدیق

واشنگٹن، 20 نومبر (یو این آئی) امریکی صدر ڈونلڈ ٹرمپ نے تصدیق کی ہے کہ ان کی میئر نیویارک سے ملاقات 21 نومبر کو ہوگی۔
غیر ملکی خبر رساں ادارے کے مطابق امریکی صدر ڈونلڈ ٹرمپ نے ایک بیان میں بتایا کہ نیویارک کے نئے میئر زہران ممدانی نے ملاقات کی درخواست کی ہے ، ہم نے اس بات پر اتفاق کیا ہے کہ یہ میٹنگ جمعہ 21 نومبر کو اوول آفس میں ہوگی۔
واضح رہے کہ رواں ماہ مسلم امیدوار زہران ممدانی نیویارک سٹی کے میئر منتخب ہوئے ہیں، زہران ممدانی کا مقابلہ نیویارک کے سابق گورنر اور آزاد امیدوار ‘اینڈریو کومو’ اور ری پبلکن حریف ‘کرٹس سلوا’ سے تھا۔
میئر نیویارک زہران ممدانی اور امریکی صدر ٹرمپ کے درمیان تعلقات ناخوشگوار رہے ہیں، الیکشن مہم کے دوران زہران ممدانی نے صدر ٹرمپ اور ان کی جماعت کو تنقید کا نشانہ بنایا جب کہ ٹرمپ نے انہیں فنڈز جاری نہ کرنے کی بھی دھمکی دی تھی۔