ہندوارہ میں نارکو ٹیرر ماڈیول بے نقاب، باپ بیٹا گرفتار:پولیس

ہندوارہ/۲۰ نومبر
ہندوارہ پولیس اور۱۶۲ویں بٹالین سی آر پی ایف کی مشترکہ کارروائی میں کالام آباد علاقے میں سرگرم ایک نرکو ٹیرر ماڈیول کو بے نقاب کیا گیا ہے، حکام نے جمعرات کو بتایا۔
مصدقہ خفیہ اطلاع پر کارروائی کرتے ہوئے کہ کچھ افراد کے پاس تجارتی مقدار میں منشیات کے ساتھ غیر قانونی اسلحہ و گولہ بارود موجود ہے، پولیس اسٹیشن کالام آباد میں ایف آئی آر نمبر۳۸/۲۰۲۵درج کی گئی۔
یہ مقدمہ این ڈی پی ایس ایکٹ کی دفعہ ۸/۲۱ یو اے (پی) ایکٹ کی متعلقہ دفعات اور اسلحہ ایکٹ کی دفعہ۷/۲۵ کے تحت قائم کیا گیا ہے۔
کارروائی کے دوران ایک باپ بیٹے کو گرفتار کر لیا گیا، جن کی شناخت ۲۳ سالہ شہنواز خان ولد عبد اللطیف ساکن پٹھواری، نوگام ہندوارہ، اور ۵۳ سالہ عبد اللطیف ولد شاہ رحمان ساکن پٹھواری، نوگام ہندوارہ کے طور پر ہوئی ہے۔
ابتدائی تحقیقات میں انکشاف ہوا ہے کہ دونوں علاقے میں ایک فعال نرکو ٹیرر نیٹ ورک چلا رہے تھے، جو منشیات کی ترسیل کے ساتھ دہشت گردانہ سرگرمیوں میں بھی معاونت کرتا تھا۔
حکام کے مطابق، ’’کارروائی کے دوران ایک پستول، سات زندہ کارتوس اور ہیروئن نما تقریباً ۸۹۰ گرام وزنی ممنوعہ مواد برآمد کیا گیا ہے۔‘‘
مزید بتایا گیا کہ اس نیٹ ورک اور اس کے روابط کے بارے میں تحقیقات جاری ہے۔ویب ڈیسک