پونچھ اور ادھمپور میں منشیات گرفتار ہیروئن/چرس جیسا مواد بر آمد:پولیس

جموں/۱۸نومبر
منشیات کے خلاف کریک ڈائون کو جاری رکھتے ہوئے پونچھ پولیس نے ایک منشیات فروش کو گرفتار کرکے اس کی تحویل سے ہیروئن جیسا ممنوعہ مواد بر آمد کیا ہے ۔
ایک پولیس ترجمان نے بتایا کہ پولیس اسٹیشن سرنکوٹ کی ایک ٹیم نے ایک مصدقہ اطلاع پر کارروائی کرتے ہوئے فضل آباد پل پر ناکہ لگا دیا اور اس دوران راہگیروں اور مسافروں کی چیکنگ شروع کی۔
ترجمان نے کہا کہ تلاشی کے دوران ایک شخص کے جیب سے ایک کالے رنگ کا پالیتھین بیگ بر آمد کیا گیا جس میں ۲۰ء۱۱گرام ہیروئن جیسا مواد رکھا گیا تھا۔
پولیس ترجمان نے بتایا کہ ملزم کی شناخت انعام الحق ولد خادم حسین ساکن دھندک سرنکوٹ کے طور پر ہوئی ہے ۔
ترجمان نے کہا کہ اس سلسلے میں پولیس اسٹیشن سرنکوٹ میں این ڈی پی ایس ایکٹ کے تحت ایک ایف آئی آر زیر نمبر۲۰۲۵/۲۶۰درج کیا گیا اور مزید تحقیقات شروع کی گئی۔
ان کا کہنا ہے کہ پولیس ضلع سے منشیات کے ناسور کی بیخ کنی کو یقینی بنانے کے لئے پر عزم ہے ۔
اس دوران اودھم پور پولیس نے ایک منشیات فروش کو گرفتار کرکے اس کی تحویل سے چرس جیسا ممنوعہ مواد بر آمد کیا ہے ۔
ایک پولیس ترجمان نے بتایا کہ پولیس اسٹیشن اودھم پور کی ایک ٹیم نے جاکھانی علاقے میں معمول کی چیکنگ کے دوران ایک گاڑی کو روکا جو سری نگر سے جموں کی طرف آرہی تھی۔
انہوں نے کہا کہ چیکنگ کے دوران گاڑی سوار نے اپنی شناخت منوہر لال ولد لاجو رام ساکن کندھیل کے طور پر کی۔ان کا کہنا ہے کہ تلاشی کے دوران اس کی تحویل سے۹۰ء۴۲۲گرام چرس بر آمد کیا گیا جس کے بعد اس کو بر سر موقع ہی گرفتار کیا گیا۔
پولیس ترجمان نے بتایا کہ اس سلسلے میں پولیس اسٹیشن اودھم پور میں این ڈی پی ایس ایکٹ کے تحت زیر ایف آئی آر نمبر۲۰۲۵/۳۹۷ایک مقدمہ درج کیا گیا اور مزید تحقیقات شروع کی گئی۔انہوں نے کہا کہ اس گرفتاری کے ساتھ اودھم پور میں سال رواں کے دوران گرفتارشدہ منشیات فروشوں کی تعداد۱۶۷تک پہنچ گئی۔ایجنسیز