سرینگر،جموں شاہراہ پر ٹرک کھائی میں جاگرا، ایک ہلاک دو افراد معجزانہ طور پر بچا لیے گئے

سرینگر۱۸نومبر
سرینگرجموں قومی شاہراہ پر ناچلانہ کے مقام پر ایک ٹرک سڑک سے پھسل کر گہری کھائی میں جا گرا، جس کے نتیجے میں ایک شخص موقع پر ہی جان سے گیا جبکہ دو دیگر افراد کو زندہ بچا لیا گیا۔
سرکاری ذرائع کے مطابق واقعہ کے فوراً بعد کیو آر ٹی ٹیمیں، رامبن پولیس اور ۲۳آر آر کے اہلکار موقع پر پہنچے اور دشوار گزار پہاڑی علاقے میں ایک تیز اور خطرناک ریسکیو آپریشن شروع کیا۔ ٹیموں نے کھائی میں پھنسے دو افراد کو مسلسل جدوجہد کے بعد بحفاظت نکال لیا۔
پولیس نے ہلاک ہونے والے کی شناخت عبدالمجید لون (۴۸) کے طور پر کی، جو ضلع کوپوارہ کے محمد مقبول لون کے بیٹے تھے۔ جبکہ ٹرک کے ڈرائیور کی موجودگی اور حالت کے بارے میں بھی حتمی معلومات دستیاب نہیں ہیں۔ مقامی پولیس نے بتایا کہ ابتدائی جانچ شروع کر دی گئی ہے اور حادثے کی وجوہات کا پتہ لگایا جا رہا ہے ۔
پولیس نے بتایا کہ قانونی کارروائی عمل میں لائی جا رہی ہے اور تمام پہلوؤں سے تفتیش جاری ہے ۔شاہراہ پر اس حادثے کے بعد کچھ دیر تک ٹریفک کی آمد و رفت متاثر رہی تاہم بعد ازاں ٹریفک کو جزوی طور پر بحال کر دیا گیا۔
(یو این آئی)