راولپنڈی 12 نومبر(یو این آئی ) پاکستان اور سری لنکا کی کرکٹ ٹیموں کے درمیان تین ون ڈے انٹرنیشنل میچوں کی سیریز کا دوسرا میچ (کل) جمعرات کو راولپنڈی کرکٹ سٹیڈیم میں کھیلا جائے گا۔ پاکستانی ٹیم کو سیریز میں 0۔1 کی برتری حاصل ہے۔ پہلے ون ڈے میں پاکستان نے سنسنی خیز مقابلے کے بعد سری لنکا کو 6 رنز سے شکست دی تھی۔ پاکستانی ٹیم کی قیادت فاسٹ بالر شاہین شاہ آفریدی کریں گے جبکہ سری لنکن ٹیم چاریتھ اسلانکا کی قیادت میں میدان میں اترے گی۔
ادھرپاکستانی مڈل آرڈر ٹیم کے بیٹر سلمان علی آغا نے لیجنڈری کرکٹر اورپاکستان کے سابق کپتان عمران خان کا بڑا ریکارڈ توڑ دیا۔ آل راؤنڈر سلمان علی آغا نے سری لنکن بولنگ لائن کے خلاف شاندار ناقابل شکست سنچری سکور کی جس کی بدولت پاکستان نے 5 وکٹ پر 299 رنز بنائے۔
سلمان علی آغا نے 83 گیندوں پر 9 چوکوں کی مدد سے سنچری بنائی، وہ 87 گیندوں پر 105 رنز کے ساتھ ناٹ آؤٹ پویلین لوٹے، یہ ان کی ایک روزہ کرکٹ کی دوسری سنچری ہے۔ عمدہ پرفارمنس میں انہیں پلیئر آف دی میچ قرار دیا گیا۔
31 سالہ سلمان آغا اب تک 45 ون ڈے میچز میں 45.23 کی اوسط سے 1357 رنز اسکور کرچکے ہیں جن میں 2 سنچریاں اور 8 نصف سنچریاں شامل ہیں۔ سلمان علی آغا نے 5 نمبر کی پوزیشن پر پاکستان کے لیے زیادہ ون ڈے سنچریاں ا سکور کرنے کا محمد یوسف کا ریکارڈ برابر کردیا ہے، محمد یوسف نے بھی 5ویں پوزیشن پر بیٹنگ کرتے ہوئے 2 سنچریاں سکور کی تھیں۔ ان کے علاوہ عمران خان، باسط علی، سرفراز احمد، اعجاز احمد، فواد عالم اور شعیب ملک نے اس نمبر پر بیٹنگ کرتے ہوئے ایک ، ایک سنچری سکور کررکھی ہے۔
