پاکستان نے دوسرے ٹی 20 میں جنوبی افریقا کو شکست دے دی

لاہور یکم نومبر(یو این آئی )
پاکستان نے دوسرے ٹی 20 میچ میں جنوبی افریقا کو 9 وکٹوں سے شکست دے کر تین میچوں کی سیریز 1-1 سے برابر کردی۔ لاہور کے قذافی اسٹیڈیم میں کھیلے گئے میچ میں پاکستان نے جنوبی افریقا کی جانب سے دیا جانے والا 111 رنز کا ہدف باآسانی ایک وکٹ کے نقصان پر 13.1 اوورز میں حاصل کرلیا۔
صائم ایوب نے 38 گیندوں پر 71 رنز کی ناقابل شکست اننگز کھیی، صاحبزادہ فرحان 28 رنز بنا کر آؤٹ ہوئے، بابر اعظم 11 رنز کے ساتھ ناٹ آؤٹ رہے۔ بابر اعظم نے ٹی 20 انٹرنیشنل میں روہت شرما کو پیچھے چھوڑ دیا اور مختصر فارمیٹ میں سب سے زیادہ رنز بنانے والے کھلاڑی بن گئے۔ جنوبی افریقا کی جانب سے واحد وکٹ کوربن بوش نے حاصل کی۔
اس سے جنوبی افریقا کی ٹیم 19.2 اوورز میں 110 رنز پر ڈھیر ہوگئی اور پاکستان کو جیت کے لیے 111 رنز کا ہدف دیا تھا۔
ڈیولڈ بریوس 25 رنز بنا کر نمایاں رہے، کپتان ڈونوون فریرزا 15 رنز بنا کر آؤٹ ہوئے، ہینڈرکس بغیر کوئی رن بنائے پویلین لوٹ گئے۔ بریٹز نے 5 رنز بنائے، اوپنر ڈی کوک اور ڈی زورزی 7، 7 رنز بنا کر آؤٹ ہوئے۔
پاکستان کی جانب سے فاسٹ بولر سلمان مرزا نے 14 رنز دے کر تین کھلاڑیوں کو آؤٹ کیا، فہیم اشرف نے 23 رنز کے عوض چار کھلاڑیوں کو پویلین کی راہ دکھائی۔
نسیم شاہ نے دو وکٹیں حاصل کیں اور ابرار احمد ایک وکٹ حاصل کرسکے۔
پاکستانی کپتان سلمان علی آغا نے ٹاس جیت کر جنوبی افریقا کو پہلے بیٹنگ کی دعوت دی تھی۔ یو این آئی؎م اع