آوارہ کتوں کا بحران : اعداد و شمار سے آگے کی حقیقت

جموں و کشمیر اسمبلی میں پیش ہوئے تازہ اعداد و شمار چونکا دینے والے ہیں۔ پچھلے تین برسوں کے دوران دو لاکھ سے زائد افراد کتوں کے کاٹنے کا شکار ہوئے۔ ایک طرف یہ محض صحتِ عامہ کا مسئلہ دکھائی دیتا ہے، مگر درحقیقت یہ شہری منصوبہ بندی، بلدیاتی نظم و نسق، اور انتظامی جواب دہی کی مجموعی ناکامی کی علامت بن چکا ہے۔
اعداد و شمار کے مطابق ۲۰۲۲ سے ۲۰۲۵ کے درمیان مجموعی طور پر ۲لاکھ۱۲ہزار۹۶۸واقعات رپورٹ ہوئے، جن میں جموں ڈویڑن سے۹۸ہزار۴۷۰؍ اور کشمیر ڈویڑن سے ایک لاکھ۱۴ہزار۴۹۸؍ واقعات سامنے آئے۔ جموں ضلع میں سب سے زیادہ۵۴ہزار۸۸۹واقعات درج ہوئے، جبکہ سری نگر شہر ۳۶ہزار۴۰۶ کے ساتھ دوسرے نمبر پر رہا۔ یہ اعداد محض تعداد نہیں، بلکہ شہری زندگی کے بگڑتے توازن کی گواہی ہیں۔
یہ سوال برسوں سے اٹھایا جا رہا ہے کہ اگر شہر ترقی کے نام پر پھیل رہے ہیں تو ان کے ساتھ مربوط شہری انتظام کیوں نہیں بڑھا؟ سڑکوں کے کنارے پڑے کچرے کے ڈھیر، کھلے نالے، اور ناقص ویسٹ مینجمنٹ آوارہ کتوں کے لیے خوراک کا مستقل ذریعہ بن گئے ہیں۔ نتیجہ یہ کہ یہ جانور انسانوں کے قریب رہنے کے عادی ہو گئے ہیں، اور جب خوراک یا جگہ کی قلت ہوتی ہے تو تصادم ناگزیر ہو جاتا ہے۔
حکومت نے یقیناً آوارہ کتوں کی نس بندی اور ویکسینیشن کی مہم شروع کی ہے۔ ۲۰۲۳ سے اب تک تقریباً۴۸ہزار۹۹۸کتوں کو اس عمل سے گزارا گیا ہے۔ بظاہر یہ ایک بڑی تعداد لگتی ہے، مگر جب مسئلے کی جڑ لاکھوں کی سطح پر ہو، تو یہ کوشش ایک محدود دائرے سے آگے نہیں بڑھ پاتی۔
سری نگر میونسپل کارپوریشن نے۲۷ ہزار سے زائد کتوں کی نس بندی کی، جبکہ جموں میں تقریباً ۱۳ ہزار، مگر دونوں شہروں کے باہر بیشتر اضلاع میں نظام اب بھی ابتدائی سطح پر ہے۔ اے بی سی مراکز کے قیام کا منصوبہ ابھی کاغذی مرحلے میں ہے، اور کئی اضلاع میں زمین کی نشاندہی تک مکمل نہیں ہو پائی۔
سڑکوں پر چلتے عام شہری، اسکول جاتے بچے، یا صبح سویرے ناشتہ کی دوکانوں کے قریب موجود لوگ …ہر کوئی اس خوف سے آشنا ہے کہ کب کوئی کتا حملہ کر دے۔ اسپتالوں کے اعداد و شمار بتاتے ہیں کہ محض جسمانی زخم نہیں بلکہ نفسیاتی اثرات بھی گہرے ہیں۔ بچوں میں اسکول جانے کا خوف، خواتین میں شام کے بعد باہر نکلنے سے ہچکچاہٹ، اور شہری فضا میں پھیلا غیر محسوس دباؤ… یہ سب اس مسئلے کی انسانی قیمت ہیں۔
یہ وہ لمحہ ہے جب شہری اداروں کو محض کارروائی کے بیانات سے آگے بڑھ کر جواب دہی کی ضرورت ہے۔ حکومت کے اعداد و شمار تسلی بخش دکھائی دیتے ہیں، مگر زمینی حقیقت اب بھی کچرے کے ڈھیروں اور کتوں کے غولوں میں نظر آتی ہے۔
سپریم کورٹ نے ستمبر ۲۰۲۵ میں ایک اہم ہدایت جاری کی، جس میں تمام ریاستوں اور مرکزی زیر انتظام علاقوں کو یاد دلایا گیا کہ ’آوارہ کتوں کے مسئلے سے نمٹنا محض جانوروں کی فلاح کا نہیں، انسانی جان کی حفاظت کا بھی معاملہ ہے۔‘ عدالت نے کہا کہ انمل برتھ کنٹرول رولز ۲۰۲۳ کے مطابق ہر ریاست کو مؤثر پالیسی پر عمل درآمد کی تفصیلی رپورٹ پیش کرنا ہوگی۔
عدالت نے اس بات پر بھی زور دیا کہ کتوں کی آبادی پر قابو پانے، ان کی ویکسینیشن، اور شہریوں کو محفوظ ماحول فراہم کرنے کے اقدامات میں تاخیر کسی طور برداشت نہیں کی جائے گی۔ اس فیصلے نے بلدیاتی اداروں کے لیے ایک موقع بھی پیدا کیا ہے … وہ مرکز کی مالی معاونت کے ساتھ ایک مربوط’اربن انمل ویلفیئر پالیسی‘ تشکیل دے سکتے ہیں، جو صرف کتوں کی نہیں بلکہ پورے شہری ماحولیاتی نظام کی اصلاح کرے۔
مسئلے کا حل محض نس بندی مراکز بڑھانے سے نہیں نکلے گا۔ اس کے لیے تین سطحی حکمتِ عملی درکار ہے :شہری صفائی کا نظام بہتر بنانا تاکہ کتوں کے لیے کھلے فضلاتی مقامات ختم ہوں۔بلدیاتی اداروں، محکمہ صحت اور مقامی کمیونٹیوں کے درمیان اشتراک قائم ہو تاکہ بیداری اور احتیاطی تدابیر عام ہوں۔عدالتی ہدایات پر شفاف عمل درآمد … ہر ضلع سے پیش رفت رپورٹ عوامی سطح پر شائع کی جائے تاکہ شہریوں کو یقین ہو کہ ریاست ان کی حفاظت کے لیے سنجیدہ ہے۔
یہ بھی ضروری ہے کہ میڈیا اور سول سوسائٹی اس مسئلے کو جذباتی یا سطحی بحث سے نکال کر پالیسی کی زبان میں اٹھائیں۔ کتوں کے ساتھ ہمدردی اپنی جگہ درست ہے، لیکن انسانی جان کے تحفظ پر سمجھوتہ نہیں ہو سکتا۔
دو لاکھ سے زائد متاثرین کا مطلب ہے کہ ہر ضلع، ہر محلے میں کوئی نہ کوئی شخص یا بچہ اس تجربے سے گزرا ہے۔ یہ صرف ایک اعداد و شمار کی کہانی نہیں، بلکہ ایک اجتماعی کوتاہی کا نوحہ ہے۔ سپریم کورٹ کی تنبیہ کو اگر انتظامیہ نے سنجیدگی سے نہ لیا تو یہ بحران مزید گہرا ہوگا۔
حقیقی بہتری تب آئے گی جب حکومت، بلدیاتی ادارے، اور عوام … تینوں ایک دوسرے کی ذمہ داری قبول کریں۔ مسئلہ آوارہ کتوں کا ہو یا شہری نظم کا … کسی بھی بحران کا حل تبھی نکلتا ہے جب نیت، علم، اور عمل ایک سمت میں ہوں۔
۔۔۔۔۔