تازہ پھلوں کے ٹرکوں کی بغیر روخ ٹوک نقل و حمل کی ہدایت

سرینگر//
جموں و کشمیر کے لیفٹیننٹ گورنر منوج سنہا کی طرف سے حکام کو کشمیر سے تازہ پھلوں سے لدے ٹرکوں کی نقل و حرکت میں سہولت فراہم کرنے کی ہدایت کے ایک دن بعد، پیر کو وادی کے پھلوں کے کاشتکاروں اور ڈیلروں نے اس فیصلے کا خیرمقدم کیا اور پاس کرنے پر ایل جی کا شکریہ ادا کیا۔
سوپور فروٹ منڈی کے صدر‘ فیاض احمد ملک نے اس فیصلے کا خیرمقدم کرتے ہوئے کہا کہ ایل جی سنہا کی طرف سے دی گئی ہدایات کو زمینی طور پر سختی سے لاگو کیا جانا چاہئے۔
ملک نے کہا’’ہم نے سکون کی سانس لی جب ایل جی نے خود مداخلت کی اور حکام کو پھلوں سے لدے ٹرکوں کی نقل و حرکت میں سہولت فراہم کرنے کی ہدایات دیں‘‘۔انہوں نے کہا کہ اس ہدایت سے کشمیر کے لاکھوں پھل کاشتکاروں کو راحت ملی ہے۔
ملک نے کہا’’سنہا کی مداخلت کے بعد ہمارے ٹرک اپنی اپنی منزل کی طرف بڑھ رہے ہیں۔ ہمیں حکومت پر بھروسہ ہے اور اس کے فیصلوں سے معاشرے کے ہر طبقے کو فائدہ پہنچ رہا ہے‘‘۔
گزشتہ ہفتے سوپور میں پھلوں کے کاشتکاروں اور ڈیلروں نے ایک احتجاجی مظاہرہ کرتے ہوئے الزام لگایا کہ ان کے پھلوں سے لدے ٹرکوں کو سرینگر جموں شاہراہ پر روکا جا رہا ہے۔ امرناتھ یاترا کی وجہ سے انہیں بہت زیادہ نقصان پہنچا۔
اتوار کو ایل جی سنہا نے عہدیداروں کو ہدایت دی کہ وہ پھلوں کے کاشتکاروں‘ کسانوں اور پھلوں اور سبزیوں جیسی خراب اشیاء کی نقل و حمل کرنے والے ڈیلرز کو قومی شاہراہ پر کسی قسم کی تکلیف کا سامنا نہ کرنا پڑے۔
سنہا نے کہا کہ یاتریوں اور پھلوں اور سبزیوں کے تاجروں دونوں کیلئے ٹریفک کو منظم کرنا انتظامیہ کی اولین ترجیح ہے۔