ڈونلڈ ٹرمپ کا روس کی بڑی تیل کمپنیوں پر پابندیاں عائد کرنے کا اعلان

واشنگٹن، 23 اکتوبر (یو این آئی) امریکی صدر ڈونلڈ ٹرمپ نے روس کی دو بڑی آئل کمپنیوں پر پابندیاں عائد کرنے کا اعلان کرتے ہوئے کہا امید ہے پابندیاں پوتن کو معقول رویہ اختیار کرنے پر مجبور کریں گی۔
تفصیلات کے مطابق امریکی صدر ٹرمپ نے نیٹو سیکریٹری جنرل سے ملاقات کے موقع پر میڈیا سے گفتگو کرتے ہوئے کہا کہ روس ۔ یوکرین جنگ میں ہر ہفتے ہزاروں افراد ہلاک ہو رہے ہیں، چاہتے ہیں کہ یہ جنگ جلد ختم ہو۔
انہوں نے کہا کہ روس کی دو بڑی آئل کمپنیوں پر پگابندیاں لگارہے ہیں ، روس پر پابندیاں دراصل اس بات کا اشارہ ہیں کہ امریکہ آگے کیا کرنے جا رہا ہے ،سمجھتا ہوں روس پر پابندیاں لگانے کا یہ صحیح وقت ہے ۔
امریکی صدر کا کہنا تھا کہ امید ہے پابندیاں پوتن کو معقول رویہ اختیارکرنے پر مجبور کریں گی اور روسی تیل پر عائد پابندیاں زیادہ عرصے تک برقراررکھنے کی ضرورت نہ پڑے ۔
ٹرمپ نے بتایا کہ پوتن سے بات چیت ہمیشہ مثبت رہتی ہے مگر کسی نتیجے پر نہیں پہنچتی، پوتن سے ہونے والی ملاقات منسوخ کردی گئی کیونکہ وہ انہیں "مناسب” نہیں لگی۔