’یاتر اکے دوران پریشانی پولیس کو مطلع کریں‘

اسلام آباد//
پولیس نے ہفتہ کے روز دکانداروں سمیت مقامی لوگوں پر زور دیا کہ وہ اسلام آباد ضلع میں جاری امرناتھ یاترا کے دوران انہیں درپیش کسی بھی پریشانی کے بارے میں پولیس کو مطلع کریں۔
پولیس نے اس بات پر زور دیتے ہوئے کہا کہ سکیورٹی انتظامات لازمی ہیں اور سبھی کے مفاد میں ہیں۔
پولیس نے مکینوں اور دکانداروں سے درخواست کی کہ اگر اسلام آباد ضلع میں انہیں جاری امرناتھ یاترا کے دوران کسی قسم کی پریشانی کا سامنا کرنا پڑتا ہے،تو وہ پولیس سے رابطہ کریں۔ پولیس نے عوام سے گزارش کی ہے کہ وہ سوشل میڈیا پر افواہوں پر دھیان نہ دیں۔
پولیس نے واضح کیا کہ کے پی روڈ سمیت اسلام آباد ضلع میں کہیں بھی دکانوں کو بند کرنے کا حکم نہیں دیا گیا ہے۔ اس کے علاوہ پبلک ٹرانسپورٹ کو گھنٹوں تک روکا نہیں جاتا ہے، جیسا کہ کچھ لوگ سوشل میڈیا پر دعویٰ کرتے ہیں۔
پولیس کے مطابق کچھ شرپسند یاترا گاڑیوں کی گزرنے کے دوران چند سیکنڈس کی تصاویر سوشل میڈیا پر شائع کرتے ہیںجس سے عام لوگوں کو گمراہ کرنے کی کوشش کی جاتی ہے۔
پولیس نے کہا کہ یاترا کیلئے سکیورٹی کے انتظامات ضروری ہیں‘ جو مقامی رہائشیوں اور دکانداروں سمیت ہر کسی کے مفاد میں ہیں۔
پولیس کا دعویٰ ہے کہ’شفقت ۸۱‘ نام کے ایک ٹویٹر ہینڈل کے ذریعہ افواہیں پھیلائی جاتی ہیں، تاہم ہینڈلر نے اب اْس اکاؤنٹ کو ڈلیٹ کیا ہے۔
پولیس نے اس سلسلہ میں تحقیقات شروع کی ہیاور جلد ہی اس شرپسند کوبے نقاب کرکے اس کے خلاف کارروائی کی جائے گی۔