کیرالہ میں شفی پرمبیل پر ہوئے حملے کے خلاف ریاست گیر احتجاج ہوگا

ترواننت پورم، 11 اکتوبر (یو این آئی) کیرالہ کانگریس نے اپنے کارگزار صدر اور رکن پارلیمنٹ شفی پرمبیل پر ہوئے حملے کی مذمت کی ہے اور اعلان کیا ہے کہ پارٹی ہفتے کے روز بلاک سطح پر ریاست گیر احتجاجی مارچ نکالے گی۔
کیرالہ کانگریس کے صدر اور رکن اسمبلی سنی جوزف نے الزام لگایا کہ مسٹر پرمبیل اور کانگریس کارکنان پر حملہ حکمراں سی پی ایم (مارکسسٹ کمیونسٹ پارٹی) اور ریاستی پولیس کی جانب سے ایک ”منصوبہ بند چال” تھی۔
پارٹی نے سی پی ایم اور پولیس پر الزام عائد کیا کہ انہوں نے سبریمالا کے بھگوان ایّپّا مندر کے سونے کی پرت چوری کے تنازع سے عوام کی توجہ ہٹانے کے لیے ایک پیشگی سازش رچی ہے ۔
مسٹر جوزف نے کہا کہ مسٹر پرمبیل اور کانگریس کارکنان پر حملہ حکمراں جماعت اور پولیس کی ملی بھگت سے چلی گئی ایک ”سوچی سمجھی چال” تھی۔
کانگریس کے جنرل سکریٹری اور رکن پارلیمنٹ کے سی وینوگوپال نے اس واقعے کی مذمت کی ہے اور اسے ”ظالمانہ اور منصوبہ بند حملہ” قرار دیاہے ۔
انہوں نے کہا، ”ہمارے کارکنوں کا خون رائیگاں نہیں جائے گا۔ ہم انصاف کا مطالبہ کریں گے اور اس بات کو یقینی بنائیں گے کہ ذمہ داروں کو انجام تک پہنچایا جائے ۔”
کانگریس نے حملے کی مذمت کرتے ہوئے اور اس میں ملوث افراد کے خلاف کارروائی کے مطالبے کے لیے آج پورے کیرالہ میں بلاک سطح پر ریاست گیر احتجاجی مارچ کا اعلان کیا ہے ۔