تیرتھ نگری رشی کیش کے لیے فخر کا لمحہ، ڈاکٹر جگلان کو بین الاقوامی اعزاز

رشیکیش/ نیویارک، 07 اکتوبر (یو این آئی) امریکہ میں منعقدہ اقوام متحدہ کلائمٹ ویک کانفرنس میں ہندوستان کے نمائندے اور رشی کیش کے رہائشی ماحولیاتی کارکن ڈاکٹر ونود پرساد جگلان کو انٹرنیشنل کلائمٹ ایکشن لیڈرشپ ایوارڈ 2025 سے نوازا گیا۔
اس فخر کے موقع پر انٹرنیشنل گڑھوال مہاسبھا کے بانی صدر ڈاکٹر راجے سنگھ نیگی نے اُن کا استقبال کیا۔
ڈاکٹر نیگی نے کہا کہ ”ہندوستانی اپنی صلاحیتوں سے ملک و بیرون ملک پہچان بنا رہے ہیں۔ ڈاکٹر جگلان کا یہ اعزاز نہ صرف تیرتھ نگری رشیکیش بلکہ پورے ملک کے لیے فخر کا باعث ہے ۔”
ماحولیاتی ماہر ڈاکٹر جگلان نے عالمی شہرت یافتہ آٹوموبائل کمپنی میں اعلیٰ انتظامی عہدے سے رضاکارانہ ریٹائرمنٹ لے کر ماحولیات کے تحفظ اور موسمیاتی تبدیلی پر عوام کو آگاہ کرنے کا کام جاری رکھا ہے ۔
اقوام متحدہ میں گرین اربن ایجوکیشن فلوریڈا کے ڈائریکٹر ڈان لامیشن اور گرین اسکول مینٹر ڈاکٹر ویرنندر سنگھ راوت نے انہیں اعزاز دیا۔ اس موقع پر چیف ڈیولپمنٹ آفیسر ابھینو شاہ نے بھی مبارکباد پیش کی۔