جنوبی افریقہ کی سلامی بلے باز برٹس نے کیریئر کی بہترین چوتھی پوزیشن حاصل کی

دبئی، 07 اکتوبر (یو این آئی) جنوبی افریقہ کی سلامی بلے باز ٹیزمن برٹس نے اس ہفتے جاری ہونے والی آئی سی سی خواتین ون ڈے کرکٹرز رینکنگ میں دو درجے کی چھلانگ لگاکر کیریئر کی بہترین چوتھی پوزیشن حاصل کر لی ہے۔
برٹس نے پیر کو آئی سی سی خواتین کرکٹ ورلڈ کپ میں نیوزی لینڈ کے خلاف چھ وکٹ سے جیت میں 101 رنز کی اننگز کھیل کر بلےبازوں کی فہرست میں یہ مقام حاصل کیا۔ یہ برٹس کی اس سال پانچویں سنچری ہے، جو کسی بھی خاتون کرکٹر کی طرف سے ایک کیلنڈر سال میں بنائی جانے والی سب سے زیادہ سنچریوں میں شامل ہے۔ جنوبی افریقہ نے ٹورنامنٹ کے ابتدائی میچ میں انگلینڈ سے شکست کے بعد شاندار واپسی کی۔
اس دوران، آسٹریلیا کی ایش گارڈنر نے سات درجے کی چھلانگ لگا کر بلے بازوں میں 697 رینکنگ پوائنٹس کے ساتھ پانچواں مقام حاصل کر لیا، جبکہ برٹس کے 706 پوائنٹس ہیں۔ برٹس کا اس سے قبل بہترین مقام اس سال جنوری میں 10واں تھا۔ گارڈنر کی یہ پیش رفت وائٹ فرنز کے خلاف ٹورنامنٹ کے پہلے میچ میں 83 گیندوں میں 115 رنز کی شاندار اننگز کی بدولت ہوئی، جسے آسٹریلیا نے 89 رنز سے جیتا۔
نیوزی لینڈ کی کپتان صوفی ڈیوائن بھی بلے بازوں کی فہرست میں سات درجے اوپر چڑھ کر کیریئر کی بہترین آٹھویں پوزیشن پر پہنچ گئی ہیں۔ انہوں نے آسٹریلیا اور جنوبی افریقہ کے خلاف بالترتیب 112 اور 85 رنز کی اننگز کھیلیں۔ ان کا آخری بار یہ مقام اکتوبر 2024 میں تھا۔
پاکستان کی اوپنر سدرہ امین نے ہندوستان کے خلاف 81 رنز کی اننگز کھیل کر اپنے کیریئر کی بہترین پوزیشن حاصل کی اور تین درجے اوپر چڑھ کر 10ویں مقام پر پہنچ گئیں۔ یہ خواتین ون ڈے بیٹنگ رینکنگ میں ان کی پہلی ٹاپ 10 موجودگی ہے۔ اس سے قبل دسمبر 2023 میں ان کا بہترین مقام 13واں تھا۔
اسی طرح دیگر ترقی کرنے والی کھلاڑیوں میں ہندوستان کی دپتی شرما بھی شامل ہیں، جو سری لنکا اور پاکستان کے خلاف بالترتیب 53 اور 25 رنز کی اننگز کھیلنے کے بعد ایک درجے اوپر چڑھ کر 17ویں مقام پر پہنچ گئی ہیں۔