پچ پر بیٹنگ کرنا آسان نہیں تھا: ہرمن پریت

کولمبو، 6 اکتوبر (یو این آئی ) خواتین ون ڈے ورلڈ کپ 2025 میں ہندوستان کی مسلسل دوسری جیت کے بعد ہندوستانی ٹیم کی کپتان ہرمن پریت کور نے کہا کہ اس پچ پر بیٹنگ کرنا آسان نہیں تھا۔
پاکستان کو 88 رنز سے شکست دینے کے بعد ہرمن پریت نے کہا، "سچ پوچھیں تو پچ پر بیٹنگ کرنا آسان نہیں تھا۔ ہم صرف لمبی اننگ کھیلنا چاہتے تھے اور دیکھنا چاہتے تھے کہ ہم کتنے رنز بناسکتے ہیں۔ جب ہم نے مئی میں یہاں سہ فریقی سیریز کھیلی تو پچیں مختلف تھیں۔ لیکن گزشتہ دو دنوں سے ہونے والی بارش نے پچ کو کچھ سست بنا دیا، اہم بات یہ تھی کہ ہم نے اپنی وکٹیں بچائے رکیھں۔
انہوں نے مزید کہا، "بہتری کے بہت سے شعبے ہیں، لیکن ابھی مجھے خوشی ہے کہ ہم نے یہ میچز جیتے ہیں۔ ہم صرف اسی رفتار سے آگے بڑھنا چاہتے ہیں۔ اب ہم ہندوستان واپس جائیں گے، جہاں ہم جانتے ہیں کہ پچز کیسی ہوں گی۔
سری لنکا کے خلاف پہلے میچ کی طرح، ہندوستان کی نچلے آرڈر کی بیٹنگ نے ٹیم کو بچایا اور ایک چیلنجنگ مجموعہ کھڑا کیا۔ ہندوستان نے اننگز کے دوران رفتار تلاش کرنے کے لئے جدوجہد کی۔ ایک موقع پر ہندوستان کا اسکور 7 وکٹوں پر 203 رنز تھا اور وہ آل آؤٹ ہونے کے راستے پر تھا، لیکن ریچا گھوش کے ناقابل شکست 35 (20 گیندوں) نے اسکور کو 247 تک پہنچا دیا۔ اس کے بعد تیز گیند باز کرانتی گوڑنے ابتدائی وکٹیں حاصل کیں اور دیپتی شرما اور اسنیہہ رانا نے باقی کام انجام دیا۔ گوڑ کو ان کی شاندار کارکردگی کے لیے پلیئر آف دی میچ قرار دیا گیا۔
گوڑنے بہت تیز گیند کی، نئی گیند کو چاروں طرف سوئنگ کیا اور بلے بازوں کو پچ سے سے پریشان کیا۔ ہندوستان کی فیلڈنگ مایوس کن رہی، چار کیچز گرائے، جن میں سے تین پاکستان کی ٹاپ اسکورر سدرہ امین کے تھے۔ ہندوستان اب اپنے اگلے دو میچ 9 اکتوبر کو جنوبی افریقہ اور 12 اکتوبر کو وشاکھاپٹنم میں آسٹریلیا کے خلاف کھیلے گا۔