ایسوسی ایشن آف ٹینس پروفیشنلز (اے ٹی پی) نے فائنلز کے لیے تاریخ کی سب سے بڑی انعامی رقم کا اعلان کر دیا ہے۔ ٹورنامنٹ میں ناقابل شکست رہنے والے سنگلز کھلاڑی کو 50 لاکھ 71 ہزار ڈالرز ملیں گے، جو کہ رواں برس یو ایس اوپن مینز اور ویمنز ایونٹس کی انعامی رقم سے تھوڑی زیادہ ہے۔ یو ایس اوپن جیتنے پر کارلوس الکاریز اور ارینا سبالنکا کو 50، 50 لاکھ ڈالرز دیے گئے تھے، جب کہ گزشتہ برس اے ٹی پی فائنلز میں ناقابل شکست رہنے والے یانک سنر کو 48 لاکھ 81 ہزار ایک سو ڈالرز ملے تھے۔ اے ٹی پی فائنلز کی مجموعی انعامی رقم اس بار 15.5 ملین ڈالرز مقرر کی گئی ہے۔ منتظمین نے ڈبلز مقابلوں کے ناقابل شکست کھلاڑیوں کے لیے بھی ریکارڈ انعامی رقم کا اعلان کیا ہے جس کے تحت ناقابل شکست کھلاڑیوں کو 9 لاکھ 59 ہزار 3 سو ڈالرز ملیں گے۔ اے ٹی پی فائنلز 9 سے 16 نومبر تک اٹلی میں شیڈول ہیں جس کے لیے کارلوس الکاریز اور یانک سنر پہلے ہی کوالیفائی کر چکے ہیں۔
