اتراکھنڈ میں پہلی سی بی ایس ای قومی تلوار بازی چیمپئن شپ شروع

رُدراپور، 30 ستمبر (یو این آئی) اتراکھنڈ کے اُدھم سنگھ نگر ضلع کے رُدراپور میں پہلی سنٹرل بورڈ آف سیکنڈری ایجوکیشن (سی بی ایس ای) قومی تلوار بازی مقابلہ منگل کے روز شروع ہوا۔ کھیلوں کی وزیر ریکھا آریہ نے اس مقابلے کا افتتاح کیا۔
دہلی پبلک اسکول میں منعقدہ اس چیمپئن شپ کے افتتاحی موقع پر وزیر کھیل محترمہ آریہ نے کہا کہ سی بی ایس ای نے اپنی کھیل سرگرمیوں میں تلوار بازی کو شامل کیا ہے ۔ پہلی سی بی ایس ای قومی تلوار بازی چیمپئن شپ کی میزبانی اُدھم سنگھ نگر کو ملی ہے ۔
اس موقع پر کھلاڑیوں سے خطاب کرتے ہوئے محترمہ آریہ نے کہا کہ ہم تلوار بازی چیمپئن شپ کے انعقاد کے لیے پُرجوش ہیں۔ یہ چیمپئن شپ شانداراور تاریخی ہوگی۔ اس قومی چیمپئن شپ کے انعقاد سے نہ صرف ملک اور ریاست بلکہ مقامی نوجوانوں کو بھی فائدہ پہنچے گا۔ انہوں نے کہا کہ تمام کھلاڑیوں کے ساتھ ریاست اور مرکز کی حکومت کھڑی ہے ۔
انہوں نے مزید کہا کہ وزیراعظم نریندر مودی کھیلوں کو فروغ دے رہے ہیں، اس لیے تمام نوجوان کھیلوں میں دلچسپی لے کر فائدہ اٹھائیں۔ محترمہ آریہ نے کہا کہ 2036 میں ملک میں اولمپک کھیل منعقد ہوں گے اور ان تمام کھیلوں کو اولمپک میں شامل کیا جائے گا۔ اس لیے کھلاڑی ابھی سے اپنا ہدف مقرر کریں اور سخت محنت کے ساتھ آگے بڑھیں تاکہ اولمپک میں زیادہ سے زیادہ تمغے جیت سکیں۔
انہوں نے کہا کہ ریاستی اور مرکزی حکومتیں کھیل اور کھلاڑیوں کو مسلسل فروغ دے رہی ہیں۔ انہوں نے نوجوانوں سے اپیل کی کہ وہ تعلیم کے ساتھ کھیلوں میں بھی دلچسپی لے کر حصہ لیں۔ انہوں نے کہا کہ آج کھیلوں میں نام، دَام اور انجام سب کچھ ہے ۔ کھیل زندگی میں ہمیں نظم و ضبط، محنتی بناتے ہیں اور قیادت و فیصلہ سازی کی صلاحیت پیدا کرتے ہیں۔ انہوں نے کہا کہ اگر کوئی بھی نجی ادارہ کھیلوں کے اسکول قائم کرنا چاہتا ہے تو اس کی حوصلہ افزائی کی جائے گی۔