پوائی میں خاتون وکیل کا قتل، شوہر گرفتار

ممبئی، 28 ستمبر (یو این آئی) ممبئی کے پوائی علاقے میں ایک 56 سالہ خاتون وکیل ساوتری دیوی چندر بھان کو مبینہ طور پر ان کے شوہر نے قتل کر دیا۔ پولیس نے شوہر راجیو چندر بھان کو گرفتار کر لیا ہے ۔ ابتدائی تحقیقات کے مطابق ساوتری دیوی اپنے شوہر سے علیحدہ رہ رہی تھیں اور راجیو انہیں دوبارہ ساتھ رہنے پر آمادہ کرنے کی کوشش کر رہا تھا۔ انکار پر غصے میں اس نے مبینہ طور پر تکیے سے ان کا گلا گھونٹ دیا۔
ساوتری دیوی پوائی کی راہیجا عمارت میں اکیلی رہتی تھیں۔ اتوار کی سہ پہر وہ اپنے گھر میں بے ہوش پائی گئیں۔ مقامی افراد نے پولیس کو اطلاع دی اور انہیں اسپتال منتقل کیا گیا مگر ڈاکٹروں نے انہیں مردہ قرار دیا۔ پوسٹ مارٹم میں دم گھٹنے کی تصدیق ہوئی جس کے بعد پولیس نے قتل کا معاملہ درج کر لیا۔
تحقیقات کے دوران معلوم ہوا کہ ساوتری اور راجیو پہلے پوائی کے راہیجا وہار علاقے میں ایک ساتھ رہتے تھے ۔ دو سال قبل راجیو نجی ایئر لائن سے ریٹائر ہوا، جس کے بعد میاں بیوی کے درمیان جھگڑے شروع ہو گئے اور وہ الگ رہنے لگے ۔ ساوتری پوائی میں جبکہ راجیو مرول میں مقیم تھا۔ حالیہ دنوں میں وہ بار بار ساوتری کو دوبارہ اکٹھے رہنے کے لیے راضی کرنے کی کوشش کر رہا تھا۔ اتوار کو بھی وہ اسی مقصد سے ان کے گھر گیا تھا۔ انکار پر دونوں میں جھگڑا ہوا اور اس دوران راجیو نے مبینہ طور پر ساوتری کا منہ تکیے سے ڈھانپ کر ان کی جان لے لی۔ پولیس نے راجیو کو حراست میں لے کر قتل کا مقدمہ درج کر لیا ہے اور مزید تفتیش جاری ہے ۔