روس کو کسی کے ساتھ جنگ کی ضرورت نہیں: میدوی ایدف

ماسکو، 29 ستمبر (یو این آئی) روسی سلامتی کونسل کے نائب صدر دمتری میدوی ایدف نے پیر کے روز کہا کہ روس کو یورپ سمیت کسی سے بھی جنگ کرنے کی کوئی ضرورت نہیں ہے ۔
مسٹر میدوی ایدف نے کہا کہ روس کو کسی سے بھی جنگ کرنے کی ضرورت نہیں ۔ اب یورپ میں ایسا کچھ نہیں بچا جس سے فائدہ حاصل ہو سکے ۔ یورپ کی معیشت کمزور ہے ، وہ امریکہ پر انحصار کر رہا ہے اور اس کی ثقافت شرمناک حد تک بگڑ چکی ہے ۔ یورپ اپنی شناخت کھو رہا ہے اور جارحانہ تارکین وطن میں ضم ہوتا جا رہا ہے ۔
انہوں نے کہا کہ روس ہمیشہ یورپ کے لیے ایک نجات دہندہ کے طور پر آیا ہے ، کبھی حملہ آور کے طور پر نہیں۔ انہوں نے کہا کہ یورپ اور روس کے درمیان تنازع کی صورت میں بڑے پیمانے پر تباہی پھیلانے والے ہتھیاروں کے استعمال سے شدید بربادی کا خطرہ ہے ۔مسٹر میدوی ایدف نے کہا کہ روسی عوام کا بنیادی کام اپنے علاقوں کی ترقی ہے ، جس میں ہماری دوبارہ حاصل کردہ زمینوں کی بحالی بھی شامل ہے ، یہ نہ تو آسان ہے اور نہ ہی سستا۔
مسٹر میدوی ایدف نے کہا کہ ”یورپی ممالک کمزور اور تقسیم شدہ ہیں، آج کے معاشی انتشار میں وہ صرف اپنے مفادات تک محدود ہیں اور زندہ رہنے کی کوشش کر رہے ہیں۔ وہ روس کے ساتھ جنگ کا خطرہ مول نہیں لے سکتے ، یورپی رہنماؤں میں کامیاب عسکری فیصلے کرنے کی مطلوبہ مہارت کا فقدان ہے ۔
یورپی ممالک میں ہر طرف یہ بات ہو رہی ہے کہ آئندہ پانچ برسوں میں روس کے ساتھ جنگ ہو سکتی ہے ، ایسا نہیں ہونا چاہیے ، کیونکہ یہ ہمارے ملک کے مفادات کے خلاف ہے ۔