ہوشیار پور میں غیر مقیم ہندوستانی اور خاتون کیئر ٹیکر کا قتل

ہوشیار پور، 25 ستمبر (یو این آئی) پنجاب میں ضلع ہوشیار پور کے ایک گاؤں میں غیر مقیم ہندوستانی باشندے اور اس کے گھریلو ملازم کو تیز دھار ہتھیار سے قتل کر دیا گیا۔
ہوشیار پور کے پولس سپرنٹنڈنٹ مکیش کمار نے جمعرات کے روز بتایا کہ مقتولین کی شناخت مورنوالی گاؤں کے این آر آئی سنتوکھ سنگھ (60) اور جالندھر کے نورمحل علاقے کے تحت باتھ گاؤں کی رہنے والی منجیت کور (46) کے طور پر کی گئی ہے ۔
یہ واقعہ جمعرات کی صبح اس وقت سامنے آیا جب منجیت کور کا بھائی سوہن سنگھ اس سے ملنے مورانوالی گیا تھا۔ وہ گھر کا مرکزی دروازہ باہر سے بند پایا اور بار بار فون کرنے کے باوجود کوئی جواب نہ ملنے پر وہ دیوار پر چڑھ گیا اور کھڑکی سے اندر جھانکا، جہاں اس نے اپنی بہن اور سنتوکھ سنگھ کی لاشیں پڑی ہوئی دیکھیں۔
پولیس سپرنٹنڈنٹ نے بتایا کہ دونوں کے جسم پر تیز دھار ہتھیاروں سے زخموں کے نشانات تھے ۔ حکام کے مطابق سنتوکھ سنگھ تقریباً دو تین ماہ قبل کناڈا سے واپس آیا تھا اور مورنوالی میں اپنے گھر میں مقیم تھا، جب کہ منجیت کور وہاں گزشتہ تین سال سے بطور نگراں کام کر رہی تھی۔
انہوں نے کہا کہ لاشوں کی حالت سے لگتا ہے کہ قتل تقریباً 36 گھنٹے پہلے ہوا ہے ۔ انہوں نے کہا کہ منجیت کور کے خاندان کا ان سے آخری بار 23 ستمبر کی شام کو رابطہ ہوا تھا۔ مسٹر مکیش کمار نے نامہ نگاروں کو بتایا، "فورنسک ٹیم کو جائے وقوعہ پر بلایا گیا ہے ۔ ہم خاندان سے ملنے والی اطلاع پر کارروائی کر رہے ہیں اور جلد ہی اس دوہرے قتل کو حل کر لیں گے ۔ جلد سے جلد ملزم کو گرفتار کر لیا جائے گا۔” انہوں نے کہا کہ گڑھشنکر تھانے میں مقدمہ درج کر لیا گیا ہے اور تفتیش جاری ہے ۔