بنگلہ دیشی کپتان لٹن داس انجری کا شکار،میچ میں شرکت فٹنس سے مشروط

دبئی 23 ستمبر(یو این آئی ) بنگلہ دیشی کرکٹ ٹیم کو ہندوستان کے خلاف سپر فور مرحلے کے اہم میچ سے قبل بڑا دھچکا لگا ہے، جب کپتان لٹن داس ٹریننگ کے دوران کمر کی تکلیف کا شکار ہو گئے۔کرکٹ ویب سائٹ کے مطابق لٹن داس نے 22 ستمبر کو آئی سی سی اکیڈمی گراؤنڈ میں تربیتی سیشن میں بیٹنگ کے دوران اس وقت کمر میں درد محسوس کیا جب وہ سکوائر کٹ کھیلنے کی کوشش کر رہے تھے ۔
فزیو تھراپسٹ بایزید الاسلام نے ان کا معائنہ کیا، جس کے بعد انہیں تربیتی سیشن سے ہٹا دیا گیا۔ ٹیم انتظامیہ کے مطابق ظاہری طور پر لٹن داس کی حالت بہتر لگ رہی ہے، لیکن حتمی فیصلہ طبی جانچ کے بعد ہی کیا جائے گا۔لٹن داس کی بھارت کے خلاف میچ میں شرکت فٹنس سے مشروط ہے اور اگر وہ دستیاب نہ ہوئے تو یہ بنگلہ دیش کے لیے بڑا نقصان ہوگا، کیونکہ بورڈ نے اب تک کسی نائب کپتان کا اعلان نہیں کیا ہے، جس سے قیادت کا معاملہ پیچیدہ ہو سکتا ہے۔واضح رہے کہ بنگلہ دیش نے سپر فور مرحلے کا آغاز سری لنکا کے خلاف شاندار فتح سے کیا تھا۔ ہندوستان کے خلاف میچ ٹیم کے لیے فیصلہ کن ثابت ہو سکتا ہے۔