دبئی،22 ستمبر(یو این آئی ) ایشیاء کپ کے سپر فور مرحلے کے اہم میچ میں ہندوستان سے ہارنے کے بعد پاکستان فائنل میں کیسے پہنچے گا؟ صورتحال واضح ہوگئی۔ تفصیلات کے مطابق ہندوستان اور بنگلہ دیش نے سپر فور مرحلے کے اپنے اب تک کے میچز جیت لیے ہیں،ہندوستان نے اتوار کے روز روایتی حریف پاکستان کو چھ وکٹوں سے شکست دی، اس سے پہلے بنگلہ دیش کی ٹیم سری لنکا کو چار وکٹوں سے ہراچکی ہے، ان نتائج کے بعد ہندوستان اور بنگلہ دیش دو دو پوائنٹس کے ساتھ پوائنٹس ٹیبل پر سرفہرست ہیں۔
اس وقت ہندوستان 0.689 کے بہتر نیٹ رن ریٹ کے باعث پہلے نمبر پر ہے، بنگلہ دیش 0.121 کے ساتھ دوسرے نمبر پر ہے، پاکستان اور سری لنکا کے حصے میں ابھی تک کوئی پوائنٹ نہیں آیا لیکن چار میچ باقی ہونے کے باعث دونوں ٹیمیں اب بھی فائنل کی دوڑ میں شامل ہیں جس کے لیے پاکستان کو اپنے اگلے دونوں میچ جیتنے ہوں گے، پہلے منگل کو سری لنکا کے خلاف اور پھر جمعرات کو بنگلہ دیش کے خلاف بھی فتح ضروری ہے، ان دو کامیابیوں کے ساتھ پاکستان کو چار پوائنٹس مل جائیں گے، اس طرح اگلے اتوار کو ہندوستان کے ساتھ فائنل میں تیسری بار ٹاکرا ممکن ہے۔
کیوں کہ اگر پاکستان نے سری لنکا کو منگل کے روز شکست دی تو سری لنکا مسلسل دو میچ ہارنے کی وجہ سے ایونٹ سے باہر ہو جائے گا، ہندوستان اور بنگلہ دیش بدھ کو آمنے سامنے ہوں گے اور توقع ہے کہ ہندوستانی ٹیم یہ میچ جیت کر فائنل میں ناقابل شکست رسائی حاصل کرے گی، اس صورت میں پاکستان کے لیے جمعرات کو بنگلہ دیش کے خلاف مقابلہ ایک ورچوئل سیمی فائنل ہوگا جب کہ جمعہ کوہندوستان اور سری لنکا کا میچ پھر محض رسمی نوعیت کا رہ جائے گا۔
