دہلی پولیس نے 2700 کروڑ روپے کے گھوٹالے میں تین افراد کو گرفتار کیا

نئی دہلی، 19 ستمبر (یو این آئی) دہلی پولیس کے اقتصادی جرائم ونگ (ای او ڈبلیو) نے لوگوں سے زیادہ منافع کا جھانسہ دے کر سرمایہ کاری کرانے والے گینگ کا پردہ فاش کیا ہے اور اس گھپلے کی رقم خٓ اندازہ تقریباً 2,700 کروڑ روپے کا ہے ۔
ایڈیشنل کمشنر، اقتصادی جرائم ونگ، امرتا گوگولوتھ نے آج بتایا کہ اس سلسلے میں اب تک تین ملزمین کو گرفتار کیا گیا ہے ۔ تازہ ترین کارروائی میں جوگل کشور نامی ملزم کو گرفتار کیا گیا ہے ، جب کہ اس کے دو ساتھی، سبھاش بجارنیا اور اومندر بجارنیا، پہلے ہی عدالتی حراست میں ہیں۔
تینوں پرملک بھر میں تقریباً 150 کیسز درج ہیں، جن میں سب سے زیادہ کیس راجستھان میں ہیں۔ کل گھپلے کی رقم کا تخمینہ تقریباً 2,700 کروڑ روپے کا ہے ۔
متاثرین کی جانب سے کراول نگر کی رہائشی نیہا کماری سمیت 98 سرمایہ کاروں نے شکایت درج کرائی تھی۔ شکایت میں کہا گیا ہے کہ نیکسا ایورگرین پرائیویٹ لمیٹڈ نامی کمپنی کے آپریٹروں نے دھولیرا، احمد آباد، گجرات میں زمین دلانے اورہرہفتے طے شدہ منافع دینے کا وعدہ کیا تھا۔ ملزمان نے سرمایہ کاروں کو ورغلانے کے لئے وزیر اعظم کے ویڈیوز دکھاکر یہ جھوٹ پھیلایا کہ وہ اس پروجیکٹ کے ‘برانڈ ایمبیسیڈر’ ہیں۔
تحقیقات سے یہ بات سامنے آئی کہ کمپنی نے ہزاروں لوگوں کو موبائل ایپ کے ذریعے سرمایہ کاری پر آمادہ کیا اور ابتدائی طور پر ہر منگل کو تین فیصد سود کی پیشکش کر کے اعتماد پیدا کیا۔ اس کے بعد ایپ کو بند کر دیا گیا اور کمپنی کے دفاتر کو سیل کر دیا گیا۔ بیشتر متاثرین سرکاری ملازم بتائے جاتے ہیں۔
تازہ ترین گرفتار ملزم، جوگل کشور شرما (57) جو شاہدرہ کا رہائشی ہے ، پجاری اور پراپرٹی بروکر کے طور پر کام کرتا تھا اور اس کی صرف پانچویں جماعت کی تعلیم ہے ۔ اس نے اہم ملزمین کے ساتھ مل کر وشواس نگر علاقہ میں ایک دفتر کھولا اور سرمایہ کاروں سے رقم وصول کی۔
اقتصادی جرائم ونگ نے عوام کو متنبہ کیا ہے کہ وہ زیادہ منافع کا وعدہ کرنے والی کسی بھی کمپنی کا شکار نہ ہوں اور اس بات کو یقینی بنائیں کہ کمپنی یا ادارہ سرمایہ کاری سے پہلے آراوسی، سیبی، آربی آئی یا دیگر مجاز اتھارٹیز کے ساتھ رجسٹرڈ ہے