ہندوستان نے دشمن کو دکھا دیا کہ ہمارا جواب کتنا سخت ہو سکتا ہے:راجناتھ

نئی دہلی/۱۹ ستمبر
وزیر دفاع راجناتھ سنگھ نے کہا ہے کہ پہلگام میں دہشت گردانہ حملے کے بعد شروع کیے گئے’آپریشن سندور‘ کے دوران ہندوستان نے دشمن کو دکھا دیا کہ ملک کا جوابی وار کتنا طاقتور ہو سکتا ہے۔
وزیر دفاع ۱۹۶۵کی جنگ کے سابق فوجیوں کے ایک گروپ سے گفتگو کر رہے تھے۔
انہوں نے کہا کہ مسلح افواج نے جس جرات اور ہم آہنگی کے ساتھ اس کارروائی کو انجام دیا، اس نے ثابت کر دیا ہے کہ فتح اب ہندوستان کے لیے کوئی استثنا نہیں بلکہ عادت بن چکی ہے۔
راجناتھ سنگھ نے کہا’’ہم نے آپریشن سندور کے ذریعے دشمن کو دکھا دیا کہ ہمارا جواب کتنا سخت ہو سکتا ہے۔ ہماری ٹیم نے جس ہم آہنگی اور جرأت کا مظاہرہ کیا، اس نے ثابت کیا کہ جیت اب ہمارے لیے معمول ہے اور ہمیں اسے ہمیشہ برقرار رکھنا ہوگا‘‘۔
وزیر دفاع نے مزید کہا کہ پہلگام دہشت گردانہ حملے کے بعد حکومت نے یہ فیصلہ کیا تھا کہ اس میں ملوث عناصر کو سخت سزا دی جائے گی۔
ان کاکہنا تھا’’جب بھی وہ واقعہ یاد آتا ہے دل بوجھل ہو جاتا ہے۔ اس حملے نے سب کو ہلا کر رکھ دیا، لیکن ہمارے حوصلے کو توڑ نہ سکا۔ وزیر اعظم نے یہ عزم کیا ہے کہ اس بار دہشت گردوں کو ایسا سبق سکھایا جائے گا جس کا انہوں نے کبھی تصور بھی نہیں کیا ہوگا‘‘۔
واضح رہے کہ پہلگام حملے میں۲۶؍ افراد کی ہلاکت کے بعد ہندوستان نے ۷ مئی کو ’آپریشن سندور‘کے تحت پاکستان کے زیر انتظام علاقوں میں دہشت گردی کے ڈھانچوں کو نشا نہ بنایا۔ اس کارروائی کے نتیجے میں چار دن تک شدید جھڑپیں ہوئیں، جو ۱۰ مئی کو فوجی کارروائیاں روکنے کے معاہدے کے ساتھ اختتام پذیر ہوئیں۔
وزیر دفاع نے مزید کہا کہ آزادی کے بعد سے ہندوستان کو اپنے ہمسایوں کے معاملے میں خوش قسمتی حاصل نہیں رہی، تاہم قوم نے کبھی بھی چیلنجوں کو تقدیر سمجھ کر قبول نہیں کیا۔
سنگھ کے مطابق’’ہندوستانیوں کی یہی خصوصیت ہے کہ ہم نے مشکلات کے آگے ہتھیار نہیں ڈالے بلکہ محنت کے ساتھ اپنی تقدیر اور مستقبل خود بنایا۔‘‘