وزیرا علیٰ اب پیرس کے سیاحتی میلے میں شرکت نہیں کریں گے

سرینگر/۱۸ستمبر
وزیر اعلیٰ عمر عبداللہ اور ان کے مشیر ناصر اسلم سوگامی اس ماہ کے آخر میں پیرس میں منعقد ہونے والے سیاحتی میلے میں شرکت نہیں کریں گے۔
ذرائع نے ایک مقامی خبر رساں ایجنسی کو بتایا کہ جموں و کشمیر کے چند افسران یونین ٹیریٹری کی نمائندگی کریں گے۔
بین الاقوامی فرانسیسی ٹریول مارکیٹ (آئی ایف ٹی ایم) ٹاپ ریزا ٹورازم فئیر، جس کا مقصد سیاحتی شعبے کو فروغ دینا ہے‘۲۳ سے۲۵ ستمبر تک منعقد کیا جانا ہے۔
ذرائع کے مطابق افسران اس میلے میں خطے کی سیاحتی صلاحیت کو اجاگر کریں گے تاکہ زیادہ سے زیادہ غیر ملکی سیاحوں کو متوجہ کیا جا سکے۔
اس سے قبل یہ اطلاعات سامنے آئی تھیں کہ وزیر اعلیٰ عمر عبداللہ پیرس میں منعقدہ اس فئیر میں شرکت کے لیے ۳ رکنی وفد کی قیادت کریں گے۔
تاہم وزیر اعلیٰ کے پیرس دورے کے فیصلے پر اپوزیشن جماعتوں نے شدید اعتراض ظاہر کیا تھا۔ ان کا کہنا ہے کہ ’’سرینگر جموں قومی شاہراہ کی بندش نے میوہ کاشتکاروں کو تقریباً ۷۰۰ کروڑ روپے کا نقصان پہنچایا ہے، ایسے میں یہ بیرون ملک دورہ درست نہیں۔‘‘