بھلسوا لینڈفل سائٹ سے ایک سال میں ختم ہوگا کچرے کا ڈھیر: کھٹر

نئی دہلی، 17 ستمبر (یو این آئی) ہاؤسنگ اور شہری امور کے مرکزی وزیر منوہر لال کھٹر نے کہا کہ بھلسوا لینڈفل سائٹ پر جمع 45 لاکھ ٹن کچرے کو آئندہ سال دو اکتوبر سے پہلے ٹھکانے لگا کر ختم کر دیا جائے گا اور وہ خود اس کام کی نگرانی کریں گے ۔
بدھ کے روز ‘سیوا پکھواڑا’ کے موقع پر بھلسوا لینڈفل سائٹ کے دورے اور کچرے کو ختم کرنے کے کام کا معائنہ کرنے کے بعد کھٹر نے کہا کہ 17 ستمبر کو وزیر اعظم نریندر مودی کے یوم پیدائش سے لے کر مہاتما گاندھی اور سابق وزیر اعظم لال بہادر شاستری کے یوم پیدائش، دو اکتوبر تک ‘سیوا پکھواڑا’ کے طور پر منایا جائے گا۔
اس موقع پر صفائی مہم، ایک درخت ماں کے نام، خون کے عطیے کے کیمپ اور دیگر مقابلے منعقد کیے جائیں گے ۔ انہوں نے کہا کہ پنڈت دین دیال اُپادھیائے کے یوم پیدائش 25 ستمبر کے موقع پر صفائی سے متعلق ایک بڑا پروگرام منعقد کیا جائے گا۔ ایک دن، ایک گھنٹہ، ایک سال پروگرام کے تحت اپنے آس پاس، دفتر اور گھروں میں صفائی کی مہم چلائی جائے گی، جس میں تمام شہری اپنا تعاون دیں گے ۔