پنجاب ہاکی لیگ میں نول ٹاٹا اور راؤنڈ گلاس ہاکی اکیڈمی کی شاندار جیت

جالندھر، 16 ستمبر (یو این آئی) راؤنڈ گلاس ہاکی اکیڈمی (آر جی ایچ اے) اور نول ٹاٹا ہاکی اکیڈمی، جمشیدپور نے آج اولمپین سرجیت سنگھ ہاکی اسٹیڈیم میں کھیلے گئے پنجاب ہاکی لیگ (انڈر-21) کے دوسرے ایڈیشن کے نویں دن بالترتیب ایس جی پی سی ہاکی اکیڈمی، امرتسر اور پی آئی ایس سرجیت ہاکی اکیڈمی، جالندھر کو 3-4 سے شکست دی۔ راؤنڈ گلاس ہاکی اکیڈمی 26 پوائنٹس کے ساتھ پوائنٹس ٹیبل میں سرفہرست رہی، جبکہ اسپورٹس اتھارٹی آف انڈیا، نیشنل سینٹر آف ایکسیلینس، سونی پت نے ایس ڈی اے ٹی ہاکی اکیڈمی کو 0-3 سے ہرا کر 24 پوائنٹس کے ساتھ دوسرے نمبر پر جگہ بنائی۔
اس موقع پر اولمپین اور سابق ہندوستانی کپتان منپریت سنگھ کھلاڑیوں سے ملاقات کرنے اور دن کے پہلے میچ کا مین آف دی میچ ایوارڈ دینے کے لیے اسٹیڈیم میں موجود تھے۔
نول ٹاٹا ہاکی اکیڈمی، جمشیدپور نے کل تیسرے نمبر پر موجود سرجیت ہاکی اکیڈمی، جالندھر کو شکست دے کر تیسرے نمبر پر واپسی کی، جس کی وجہ سے سرجیت اکیڈمی ایک درجہ نیچے کھسک گئی۔ میچ میں 22ویں منٹ میں منمیت سنگھ نے سرجیت اکیڈمی کو برتری دلائی، لیکن اگلے ہی منٹ سبین کیرو نے نول ٹاٹا کے لیے برابری کا گول کیا۔ چار منٹ بعد چرنجیت سنگھ کے گول سے سرجیت ہاکی اکیڈمی کو دوبارہ سبقت ملی، مگر 34 ویں منٹ میں آشیش تانی پورتی نے اسکور برابر کر دیا۔ پھر سبین کیرو نے ایک اور گول کر کے نول ٹاٹا کو آگے کر دیا، لیکن 49 ویں منٹ میں ابھیشیک گورکھی نے سرجیت کے لیے اسکور 3-3 کر دیا۔ فیصلہ کن گول نول ٹاٹا کے افریدی نے 52 ویں منٹ میں قریب سے کر کے ٹیم کو جیت دلا دی۔
راؤنڈ گلاس ہاکی اکیڈمی نے گُروِندر سنگھ، گرسیوک سنگھ اور سنی سنگھ کے گولوں کی بدولت کھیل کے صرف 16ویں منٹ میں ایس جی پی سی ہاکی اکیڈمی کے خلاف 0-3 کی برتری حاصل کر لی تھی۔ دوسرے کوارٹر میں ہروندر سنگھ اور مہکدیپ سنگھ نے پانچ منٹ کے اندر دو گول کر کے اسکور 2-3 کر دیا۔ تیسرے کوارٹر میں کوئی گول نہ ہوا۔ 49 ویں منٹ میں جپنیِت سنگھ نے پنالٹی اسٹروک پر گول کر کے آر جی ایچ اے کو 2-4 کی سبقت دلا دی۔ ہروندر سنگھ نے اپنا دوسرا گول داغ کر اسکور 3-4 کر دیا، مگر آر جی ایچ اے نے برتری برقرار رکھتے ہوئے تین اہم پوائنٹس حاصل کیے۔
نویں دن کے پہلے میچ میں سائی سونی پت نے ہیپی سنگھ، نوراج سنگھ اور متھیلیش یادو کے گولوں کی بدولت ایس ڈی اے ٹی ہاکی اکیڈمی کو 0-3 سے شکست دی۔ یہ ٹیم کی نو میچوں میں آٹھویں کامیابی تھی، جس سے وہ پوائنٹس ٹیبل میں سرفہرست آر جی ایچ اے پر دباؤ بنائے رکھے ہوئے ہے۔
دوسرے میچ میں نامدھاری ہاکی اکیڈمی نے سب سے آخری نمبر پر موجود گھومن ہیڑا رائزرز ہاکی اکیڈمی، نئی دہلی کو 0-2 سے شکست دی اور پوائنٹس ٹیبل میں چوتھے نمبر پر پہنچ گئی۔ اس میچ میں یوراج سنگھ نے دو پنالٹی کارنر کو گول میں بدل کر اپنی ٹیم کو لیگ میں تیسری مکمل کامیابی دلوائی۔