دہلی میں پہلی بار نوجوان براہِ راست حکومتی عمل میں شامل ہو رہے ہیں: ریکھا گپتا

نئی دہلی، 15 ستمبر (یو این آئی) دہلی کی وزیر اعلیٰ ریکھا گپتا نے کہا کہ پہلی بار حکومتی عمل میں نوجوانوں کو براہِ راست شمولیت دی جا رہی ہے ۔
محترمہ گپتا نے ‘ترقی یافتہ بھارت سی ایم انٹرن شپ پروگرام’ کا آغاز کرنے کے بعد کہا کہ اس انٹرن شپ پروگرام کے لیے گریجویشن اور پوسٹ گریجویشن کر رہے نو ہزار طلبہ نے درخواست دی، جن میں سے 87 نوجوانوں کو دہلی حکومت کے ساتھ کام کرنے کے لیے منتخب کیا گیا ہے ۔ انہوں نے کہا کہ آج سے تین ماہ تک یہ طلبہ دہلی حکومت کے ساتھ انٹرن شپ کریں گے ۔
انہوں نے کہا کہ مجھے خوشی ہے کہ پہلی بار دہلی حکومت نے اس نوعیت کی پہل کی ہے ، جس میں یہ نوجوان دہلی حکومت کو نئی سوچ اور نئی ٹیکنالوجی کے ساتھ جڑیں گے ۔ پہلے بھی حکومتوں نے انٹرن شپ پروگرام کرائے لیکن اس میں صرف اپنا سیاسی ایجنڈا آگے بڑھایا گیا اور اپنے لوگوں کو فائدہ پہنچایا گیا، لیکن اس بار شفاف طریقے سے بھرتی کی گئی ہے جس میں نوجوان حکومت کے ساتھ مل کر ترقی یافتہ دہلی بنائیں گے ۔
انہوں نے مزید کہا کہ یہ پہلی بار ہے جب حکومت کے عمل میں نوجوانوں کو براہِ راست شرکت دی جا رہی ہے ۔ ‘ترقی یافتہ بھارت سی ایم انٹرنشپ پروگرام’ مستقبل کے پالیسی ساز تیار کرنے اور جمہوریت کو مزید فعال بنانے کی سمت میں ایک تاریخی قدم ہے ۔
وزیر اعلیٰ نے کہا کہ یہ منصوبہ وزیر اعظم نریندر مودی کی پی ایم انٹرن شپ اسکیم سے متاثر ہے اور حکومت کے نظام میں نوجوان سوچ کو شامل کرنے کی ایک نئی پہل ہے ۔ تین دن کی تربیت کے بعد منتخب نوجوانوں کو دہلی حکومت کے مختلف محکموں میں تین ماہ با اجرت انٹرن شپ ملے گی، جہاں وہ افسران کے ساتھ کام کرتے ہوئے انتظامی عمل کو سمجھیں گے اور اپنے مشورے بھی دے سکیں گے ۔
انہوں نے کہا کہ وزیر اعظم کی رہنمائی میں ہماری حکومت نوجوانوں کو بااختیار بنانے اور انہیں قوم سازی کے جذبے سے جوڑنے کے لیے پرعزم ہے ۔