گجرات کے گورنر آچاریہ دیوورت نے مہاراشٹر کے گورنر کے طور پر حلف لیا

ممبئی، 15 ستمبر (یو این آئی) گجرات کے گورنر آچاریہ دیوورت نے اتوار کو مہاراشٹر کے گورنر کے طور پر حلف لیا۔ یہ تقریب ممبئی کے راج بھون کے دربار ہال میں منعقد ہوئی جہاں بمبئی ہائی کورٹ کے چیف جسٹس شری چندر شیکھر نے انہیں عہدے کا حلف دلایا۔ مسٹر دیوورت نے سنسکرت زبان میں حلف لیا۔
اس موقع پر وزیر اعلیٰ دیویندر فڑنویس، نائب وزیر اعلیٰ ایکناتھ شندے اور کئی دیگر معززین موجود تھے ۔ آچاریہ دیوورت کو یہ ذمہ داری سابق گورنر سی پی رادھا کرشنن کے استعفیٰ کے بعد تفویض کی گئی ہے ، جنہوں نے 11 ستمبر کو نائب صدر جمہوریہ منتخب ہونے کے بعد اپنے عہدے سے استعفیٰ دے دیا تھا۔
66 سالہ آچاریہ دیوورت 2019 سے گجرات کے گورنر کے طور پر خدمات انجام دے رہے ہیں۔ وہ سابق ماہر تعلیم اور آریہ سماج کے سرگرم پرچارک ہیں۔ گجرات کے گورنر رہنے سے قبل وہ ہریانہ کے کروکشیتر میں ایک گروکل کے پرنسپل رہ چکے ہیں۔
صدر جمہوریہ دروپدی مرمو نے رواں ہفتے کے آغاز میں انہیں باضابطہ طور پر مہاراشٹر کے گورنر کی اضافی ذمہ داری سونپی تھی۔