رونالڈو کو سعودی عرب نے گولڈن شوز ایوارڈ سے نوازا

کرسٹیانو رونالڈو کو زیادہ گول کرنے پر گولڈن شوز ایوارڈ سے نواز دیا گیا۔ عالمی شہرت یافتہ فٹبالر کرسٹیانو رونالڈو کو سیزن 2024-2025 کے لئے سعودی پروفیشنل لیگ کی جانب سے گولڈن شوز ایوارڈ سے نواز دیا گیا۔ سعودی خبر رساں ادارے کی رپورٹ کے مطابق عالمی شہرت یافتہ فٹبالر کرسٹیانو رونالڈو کو یہ اعزاز گزشتہ سیزن میں سب سے زیادہ گول کرنے پر دیا گیا ہے۔ رپورٹس کے مطابق سعودی قومی ٹیم اور النصر کلب کے سابق کپتان ماجد عبداللہ نے اسٹار فٹبالر کرسٹیانو رونالڈو کو اعزاز سے نوازا ہے۔ یہ اعزاز ریاض کے الاول پارک اسٹیڈیم میں النصر اور اس کے مہمان الخلود کے درمیان میچ کے آغاز سے قبل دیا گیا۔ واضح رہے کہ اس سے قبل النصر کی جانب سے سعودی سپرکپ کے فائنل میچ میں عالمی شہرت یافتہ فٹبالر کرسٹیانو رونالڈو نے الاہلی کے خلاف گول کیا، وہ اپنی ٹیم کو تو نہ جتواسکے تاہم انہوں نے ایک تاریخی سنگ میل عبور کرلیا۔ رپورٹس کے مطابق رونالڈو کا یہ النصرکلب کے لیے 100واں گول تھا۔ اس طرح رونالڈو نے 4 مختلف کلبوں کی نمائندگی کرتے ہوئے 100 یا زائد گول کرنے والے پہلے فٹبالر کا اعزاز حاصل کرلیا۔
اُنہوں نے ریئل میڈرڈ کے لیے 450، مانچسٹر یونائیٹڈ کے لیے145، یوونٹس کے لیے 101 اور النصر کے لیے 100 گول کیے ہیں۔