ہندوستان 2025 ورلڈ کپ کا مضبوط ترین دعویدار: میگ لیننگ

سڈنی، 13 ستمبر (یو این آئی) آسٹریلوی لیجنڈ میگ لیننگ نے ان ٹیموں کے نام ظاہر کیے ہیں جنہیں وہ آئی سی سی ویمنز کرکٹ ورلڈ کپ 2025 کا سب سے بڑا دعویدار سمجھتی ہیں۔
سابق کپتان نے کہا کہ اگرچہ وہ چاہتی ہیں کہ آسٹریلیا ایک بار پھر ٹرافی اپنے نام کرے، لیکن ان کے مطابق میزبان ہندوستان اس بار سب سے مضبوط چیلنجر ثابت ہو سکتا ہے۔
آئی سی سی ڈیجیٹل کو دیے گئے انٹرویو میں لیننگ نے کہا کہ آسٹریلیا نے کافی عرصے تک اپنا غلبہ قائم رکھا ہے، مگر یہ نتیجہ پہلے سے طے نہیں ہے۔ میں ضرور چاہوں گی کہ آسٹریلیا جیتے، لیکن مجھے لگتا ہے کہ ہندوستان سب کے لیے ایک بڑا چیلنج ہے۔
انہوں نے کہا کہ ہندوستانی ٹیم اب کسی بھی حریف سے کم نہیں اور اس نے جیتنے کے طریقے سیکھ لیے ہیں۔ یہی وہ پہلو تھا جس پر پہلے مزید کام کی ضرورت تھی اور اب ٹیم نے اس میں خاصی پیش رفت کی ہے۔
یاد رہے کہ لیننگ نے 2017 ورلڈ کپ سیمی فائنل میں آسٹریلیا کی قیادت کی تھی، جہاں ان کی ٹیم کو ہندوستان کے ہاتھوں شکست ہوئی تھی۔ بعد میں ہندوستان فائنل میں انگلینڈ سے ٹائٹل جیتنے سے محروم رہ گیا تھا۔
میگ لیننگ نے مزید کہا کہ ہرمن پریت کور کی قیادت میں ٹیم انڈیا اچھی کارکردگی دکھا رہی ہے۔ ٹیم میں ایسے کھلاڑی موجود ہیں جنہوں نے اب خاصا تجربہ حاصل کر لیا ہے۔ اگر وہ متحد ہو کر کھیلیں تو میرے خیال میں کوئی ٹیم ان کا مقابلہ نہیں کر سکتی۔
میزبان ہندوستان اور آسٹریلیا کے علاوہ، لیننگ نے کچھ اور ٹیموں کا بھی ذکر کیا جو اس بڑے ٹورنامنٹ میں اپنی صلاحیت کا مظاہرہ کر کے سب کو حیران کر سکتی ہیں۔
ان کے مطابق انگلینڈ ہمیشہ ایک مضبوط ٹیم رہی ہے، جنوبی افریقہ نے حالیہ ورلڈ کپ میں بہترین کھیل پیش کیا اور نیوزی لینڈ کو کبھی ہلکا نہیں لینا چاہیے۔ انہوں نے حالیہ ٹی20 ورلڈ کپ 2024 میں دکھا دیا کہ صحیح وقت پر رنز بنا کر کوئی بھی ٹیم مقابلہ جیت سکتی ہے۔ یہی اس کھیل کی اصل خوبصورتی ہے۔
دفاعی چیمپئن آسٹریلیا یکم اکتوبر کو اندور میں نیوزی لینڈ کے خلاف اپنے ورلڈ کپ مہم کا آغاز کرے گا، جبکہ میزبان ہندوستان 30 ستمبر کو گوہاٹی میں اپنے پہلے میچ میں سری لنکا سے ٹکرائے گا۔