نونیت کور نے ہندوستان کے لیے 200 بین الاقوامی میچ کھیلنے کا اعزاز حاصل کیا

ہانگژو، 13 ستمبر (یو این آئی) ہاکی انڈیا نے ہفتہ کو ہندوستانی کھلاڑی نونیت کور کو خاتون ایشیا کپ 2025 میں جاپان کے خلاف سپر 4 میچ میں 200 بین الاقوامی میچ مکمل کرنے پر مبارکباد دی ہے۔ نونیت فی الحال جاری ایشیا کپ میں ہندوستان کی دوسری سب سے زیادہ گول کرنے والی کھلاڑی ہیں۔
29 سالہ اس کھلاڑی نے 2013 جونیئر ویمنز ورلڈ کپ میں کانسی کا تمغہ دلانے میں اہم کردار ادا کرنے کے بعد 2014 میں سینیئر ٹیم میں ڈیبیو کیا تھا۔ تب سے وہ ہندوستانی ویمنز ہاکی ٹیم کی مستقل کارکردگی دکھانے والی کھلاڑیوں میں شامل ہیں۔ گزشتہ برسوں میں انہوں نے ہر بڑے عالمی ٹورنامنٹ میں ہندوستان کی نمائندگی کی ہے اور بین الاقوامی سطح پر ٹیم کی ترقی میں نمایاں کردار ادا کیا ہے۔
کامن ویلتھ گیمز میں نونیت نے 2022 برمنگھم ایڈیشن میں حصہ لیا جہاں انہوں نے ہندوستان کو کانسی کا تمغہ دلانے میں مدد کی۔ وہ ایشیائی کھیلوں میں بھی یادگار مہمات کا حصہ رہیں، جہاں انہوں نے 2018 میں جکارتہ-پالم بینگ میں چاندی کا تمغہ اور 2022 میں ہانگژو میں کانسی کا تمغہ جیتا۔ اس کے علاوہ نونیت اس ہندوستانی ٹیم کا بھی حصہ تھیں جس نے 2017 میں کاکامگاہارا میں ویمنز ایشیا کپ کا طلائی تمغہ جیتا اور 2022 میں مسقط ایڈیشن میں کانسی کا تمغہ حاصل کیا۔ وہ 2018 میں ڈونگھائی میں ایشین چیمپئنز ٹرافی میں چاندی کا تمغہ جیتنے والی ٹیم کا بھی حصہ تھیں۔ اس کے بعد رانچی (2023) اور راجگیر (2024) میں مسلسل طلائی تمغے جیتے۔
اپنی اس کامیابی پر نوینیت کور نے کہا، ’’یہ میرے کیریئر کا ایک بہت ہی خاص لمحہ ہے۔ 2014 میں ڈیبیو کے بعد سے یہ ایک شاندار سفر رہا ہے۔ پچھلا دہائی سیکھنے کے تجربات سے بھرا رہا ہے۔ ہر ٹورنامنٹ نے مجھے کچھ نیا سکھایا ہے اور میں اپنے خاندان، ساتھی کھلاڑیوں، کوچز اور مداحوں کے تعاون کی شکر گزار ہوں۔ ہندوستان کی جرسی پہننا میرے لیے ہر دن ایک اعزاز ہے اور ایسی کامیابیاں مجھے یاد دلاتی ہیں کہ میں کتنی شکر گزار ہوں۔ میں اپنی بہترین کارکردگی دیتی رہوں گی اور امید کرتی ہوں کہ مزید نوجوان لڑکیوں کو ہاکی کھیلنے کے لیے متاثر کروں گی۔‘‘
ہاکی انڈیا کے صدر ڈاکٹر دلیپ ترکی نے مبارکباد دیتے ہوئے کہا، ’’ہندوستان کے لیے 200 میچ کھیلنا بہترین کارکردگی اور صبر و استقامت کی علامت ہے۔ نوینیت نے حالیہ برسوں میں ہندوستانی ویمنز ٹیم کی ترقی میں اہم کردار ادا کیا ہے۔ انہوں نے اہم گول کیے ہیں، شاندار کھیل پیش کیا ہے اور نوجوان کھلاڑیوں کے لیے رول ماڈل رہی ہیں۔ ہمیں ان کی اس کامیابی پر بے حد فخر ہے اور ہم ان کے کیریئر میں مزید کامیابیوں کی دعا کرتے ہیں۔‘‘
ہاکی انڈیا کے سیکرٹری جنرل بھولا ناتھ سنگھ نے بھی کہا، ’’نونیت کور کا سفر ہر اس نوجوان لڑکی کے لیے باعث تحریک ہے جو ہندوستان کے لیے ہاکی کھیلنے کا خواب دیکھتی ہے۔ اعلیٰ سطح پر 200 میچ کھیلنے کے لیے محنت اور لگن درکار ہوتی ہے۔ ہاکی انڈیا انہیں اس شاندار کامیابی پر مبارکباد دیتا ہے اور ٹیم کی کامیابی میں ان کے مسلسل تعاون کی امید رکھتا ہے۔‘‘