ہندوستان کی خواتین ہاکی ٹیم نے جاپان کے خلاف 1-1 سے ڈرا کھیلا۔

ہانگژو (چین)، 13 ستمبر (یو این آئی) ہندوستان کی خواتین ہاکی ٹیم نے خاتون ایشیا کپ 2025 میں جاپان کے خلاف شاندار کھیل کا مظاہرہ کرتے ہوئے مقابلہ 1-1 سے ڈرا کر لیا۔ اگر چین، کوریا کو شکست دے دیتا ہے یا تین گول سے کم فرق سے ہار سے بچ جاتا ہے تو ہندوستان کی خواتین ٹیم ایشیا کپ 2025 کے فائنل میں پہنچ جائے گی۔ہندوستان کے لئے بیوٹی ڈُنگ ڈُنگ نے ساتویں منٹ میں پہلا گول داغا، جبکہ شیہو کوبایاکاوا نے 58ویں منٹ میں جاپانی ٹیم کے لئے برابری کا گول کیا۔
میچ کے آغاز میں بیوٹی ڈُنگ ڈُنگ نے ساتویں منٹ میں گول کرکے ہندوستان کو برتری دلائی۔ اس کے بعد ہندوستان نے جارحانہ کھیل جاری رکھا اور پہلا کوارٹر 1-0 پر ختم ہوا۔
دوسرے کوارٹر میں جاپان نے برابری کے گول کی کوشش کی اور شروع کے کچھ منٹوں میں ایک پینالٹی کارنر حاصل کیا، لیکن ہندوستان نے اسے آسانی سے روک دیا۔ ہندوستانی ٹیم نے گیند پر قبضہ رکھتے ہوئے حملے کئے، مگر جاپان کی دفاعی لائن مضبوط رہی اور ہاف ٹائم تک اسکور 1-0 رہا۔ تیسرا کوارٹر بھی بغیر گول کے ختم ہوا۔
آخری کوارٹر میں جاپان نے برابری کی کوشش میں حملے تیز کر دیئے، لیکن ہندوستانی خواتین ہاکی ٹیم کا دفاع جاپانی حملوں کو ناکام کرتا رہا۔ کوارٹر کے درمیانی حصے میں ہندوستان نے واپسی کرتے ہوئے کئی پینالٹی کارنر حاصل کئے اور دباؤ بنایا۔ تاہم آخری لمحات میں جاپان نے شیہو کوبایاکاوا کے ذریعے 58ویں منٹ میں گول کرکے اسکور 1-1 کر دیا۔ میچ کے اختتام تک دونوں ٹیمیں 1-1 کی برابری پر رہیں۔