ہندوستان،فرانس کے مشترکہ ورکنگ گروپ نے پہلگام حملے کی مذمت کی

نئی دہلی/۱۲ستمبر
انسداد دہشت گردی پر ہندوستان اور فرانس کے مشترکہ ورکنگ گروپ نے پہلگام دہشت گردانہ حملے کی سخت مذمت کی ہے اور منظم جرائم کو ورکنگ گروپ کی بات چیت کے دائرے میں لانے کی ضرورت پر زور دیا ہے ۔
مشترکہ ورکنگ گروپ نے اقوام متحدہ، فنانشل ایکشن ٹاسک فورس اور بین الاقوامی مالیاتی فنڈ میں تعاون پر بھی تبادلہ خیال کیا۔
جمعرات کو پیرس میں انسداد دہشت گردی پر ہندوستان فرانس کے مشترکہ ورکنگ گروپ کی۱۷ویں میٹنگ میں ہندوستانی وفد کی قیادت وزارت خارجہ کے جوائنٹ سکریٹری (کاؤنٹر ٹیررازم) کے ڈی دیول اور فرانسیسی وفد کی قیادت فرانس کے انسداد دہشت گردی کے نمائندے اولیور کارون نے کی۔
دونوں فریقوں نے جموں و کشمیر کے پہلگام میں معصوم شہریوں پر وحشیانہ دہشت گردانہ حملے کی مذمت کی۔ انہوں نے دونوں ممالک میں موجودہ خطرے کا جائزہ لیتے ہوئے تبادلہ خیال کیا۔ اس دوران انہوں نے خاص طور پر بعض ممالک کی طرف سے اسپانسر ہونے والی سرحد پار دہشت گردی، متعلقہ خطوں میں دہشت گردی کی سرگرمیوں اور مغربی ایشیا میں دہشت گردی کے خطرے کے بارے میں غور وخوض کیا۔
ورکنگ گروپ نے انسداد دہشت گردی کے چیلنجوں کا بھی جائزہ لیا، بشمول انتہا پسندی اور بنیاد پرستی کا مقابلہ کرنا، اور دہشت گردوں کی طرف سے نئی ٹیکنالوجیز کے استعمال سے لاحق خطرات۔
دونوں ممالک نے منظم جرائم کو شامل کرنے کے لیے مشترکہ ورکنگ گروپ کے مکالمے کے دائرہ کار کو وسیع کرنے پر وسیع تبادلہ خیال بھی کیا۔مشترکہ ورکنگ گروپ کا اگلا اجلاس ہندوستان میں ہوگا۔