مبینہ روسی ڈرونز تباہ کرنے کا معاملہ، چیک ریپبلک پولینڈ کے دفاع میں آگیا

پراگ، 11 ستمبر (یو این آئی) چیک ریپبلک نے پولینڈ کو ڈرون حملوں کے خطرے سے نمٹنے میں مدد دینے کیلیے خصوصی ہیلی کاپٹر بھیجنے کا اعلان کر دیا۔
سرکاری خبر رساں ادارے اے پی پی کی رپورٹ کے مطابق چیک وزارت دفاع نے بتایا کہ یہ اقدام پولینڈ کی درخواست پر کیا جا رہا ہے تاکہ کم بلندی پر پرواز کرنے والے ڈرونز سے مؤثر انداز میں دفاع کیا جا سکے ۔
وزارت نے جاری ایک بیان میں کہا کہ چیک افواج ایک اسپیشل آپریشنز ہیلی کاپٹر یونٹ روانہ کرنے کیلیے تیار ہیں جس میں تین خصوصی طور پر ترمیم شدہ Mi-171S ہیلی کاپٹر شامل ہوں گے ۔
یہ فیصلہ چیک وزیر دفاع یانا چیرنوچووا اور ان کے پولش ہم منصب وادسلاو کوسینیاک-کامیش کے درمیان ٹیلیفونک رابطے کے بعد سامنے آیا۔
وزارتِ دفاع کے مطابق تعینات کیے جانے والے فوجیوں کی تعداد 150 سے زائد نہیں ہوگی اور اس کا انحصار زمینی صورتحال اور لاجسٹک معاونت پر ہوگا۔
چیک وزیر اعظم پیٹر فیالا نے سوشل میڈیا پلیٹ فارم ایکس پر کہا کہ ہمارے ہیلی کاپٹر چند دنوں میں یورپی فضائی حدود کے دفاع میں حصہ لے سکتے ہیں۔
واضح رہے کہ گزشتہ روز پولینڈ کی فضائیہ نے متعدد ڈرونز مار گرائے جنہیں روسی ڈرونز قرار دیا گیا تھا۔
وارسا حکومت کا دعویٰ ہے کہ یہ پہلا موقع ہے نیٹو کے رکن ملک کی فضائی حدود میں روسی ڈرون مار گرائے گئے ہیں۔
دوسری جانب روس نے ان الزامات کو بے بنیاد قرار دیتے ہوئے کہا کہ مذکورہ ڈرونز یوکرین سے آئے تھے ۔