ترکیہ نے ملک بھر میں سوشل میڈیا تک رسائی محدود کردی

انقرہ، 8 ستمبر (یو این آئی) ترکیہ کی حکومت نے اپوزیشن کے احتجاج کے پیش نظر ملک بھرمیں سوشل میڈیا تک رسائی کو محدود کردیا ہے ۔
خبررساں ایجنسی روئٹرز کا کہنا ہے جن سوشل میڈیا تک رسائی محدود کی گئی ہے ان میں ایکس، یوٹیوب، انسٹاگرام، فیس بک، ٹک ٹاک اور واٹس ایپ شامل ہیں۔
نیٹ بلاکس کا کہنا ہے ترک حکومت نے اپوزیشن جماعت ری پبلکن پیپلزپارٹی کے احتجاج کے پیش نظر سوشل میڈیا پلیٹ فارمزتک عوام کی رسائی محدود کی۔
سی ایچ پی نے استنبول میں اپنے ہیڈکوارٹر کے ارد گرد پولیس کی جانب سے رکاوٹیں لگانے کے بعد ریلیاں نکالنے کا اعلان کیا تھا۔
قبل ازیں ترک وزیر خارجہ حقان فیدان کا اعلان سامنے آیا تھا کہ ملک نے اسرائیل کے ساتھ تمام اقتصادی اور تجارتی تعلقات منقطع کرنے کا فیصلہ کیا ہے ۔
انہوں نے یہ بھی کہا تھا کہ انقرہ اسرائیلی طیاروں کے لیے اپنی فضائی حدود بھی بند کر دے گا۔ یہ فیصلہ غزہ میں جاری اسرائیلی جارحیت اور انسانی المیے کے تناظر میں کیا گیا ہے ۔
فیدان نے کہا کہ ترکی نے 52 ممالک کی شرکت کے ساتھ اقوام متحدہ میں ایک اہم بین الاقوامی اقدام پر دستخط کیے ہیں، جس میں ہتھیاروں اور گولہ بارود کی سپلائی کو روکنے کا مطالبہ کیا گیا ہے جو [؟]اسرائیل کی جنگی مشین کو رسد دیتے ہیں۔
یو این آئی۔ ع ا۔