میرا ایک ہی ہدف ہے اور وہ ہے ہندوستان کے لیے کھیلنا: نشانت سندھو

بنگلورو، 06 ستمبر (یو این آئی) دلیپ ٹرافی سیمی فائنل میں اپنے آل راؤنڈ کھیل سے نارتھ زون کے لیے شاندار کارکردگی دکھانے والے ہریانہ کے نوجوان آل راؤنڈر اور انڈر-19 ورلڈ کپ جیتنے والی ٹیم کے رکن نیشانت سندھو نے کہا کہ ان کا واحد مقصد ہندوستان کے لیے کھیلنا ہے اور اس کے لیے وہ قدم بہ قدم آگے بڑھنے کی ہر ممکن کوشش کر رہے ہیں۔
ساوتھ زون کے خلاف پہلی اننگز میں بائیں ہاتھ کے اسپنر سندھو نے پانچ وکٹیں لے کر بڑے اسکور کی طرف بڑھ رہی ساوتھ زون کی اننگز کو 536 رنز پر روکنے میں اہم کردار ادا کیا۔ اس کے بعد جب نارتھ زون کی اننگز لڑکھڑائی تو سندھو بیٹ کے ساتھ ٹیم کے لیے مشکل وقت میں سہارا بنے۔ تاہم، سندھو نے کہا کہ وہ بیٹنگ میں اور بہتر کر سکتے تھے۔
سندھو نے تیسرے دن کے کھیل کے بعد ای ایس پی این کرک انفو سے کہا، ’’بولنگ کے دوران میرے ذہن میں یہی چل رہا تھا کہ جتنی جلدی ہو سکے ہم انہیں آؤٹ کریں کیونکہ وکٹ کافی اچھی تھی اس لیے انہوں نے زیادہ رنز بنائے۔ لیکن بیٹنگ کے وقت میں صرف یہی سوچ رہا تھا کہ آخر تک کھیلوں اور ٹیم کو بہتر پوزیشن میں لے جاؤں، لیکن بدقسمتی سے میں ایسا نہیں کر پایا۔ اب کل دیکھتے ہیں کہ کیسا رہتا ہے۔‘‘
21 سالہ سندھو اب تک 29 فرسٹ کلاس میچ کھیل چکے ہیں اور اس دوران چھ سنچریاں اور چھ نصف سنچریاں اسکور کرتے ہوئے 78.38 کی اوسط سے 1823 رنز بنا چکے ہیں۔ گیند کے ساتھ وہ تین بار ایک اننگز میں پانچ وکٹیں اور ایک بار میچ میں دس وکٹیں حاصل کر چکے ہیں اور مجموعی طور پر 64 شکار کیے ہیں۔ انہوں نے اپنے کھیل کے بارے میں بات کرتے ہوئے کہا کہ پریکٹس کے دوران ان کی یہی کوشش ہوتی ہے کہ کھیل کے ہر پہلو پر کام کریں۔ ساوتھ زون کے خلاف انہوں نے پانچ وکٹیں لینے کے ساتھ این جگدیشن (197) کو رن آؤٹ بھی کیا تھا۔
سندھو نے کہا، ’’ہر میچ میں یہی کوشش کرتا ہوں کہ بیٹنگ، بولنگ اور فیلڈنگ میں ٹیم کے لیے 100 فیصد دوں۔ میں عام طور پر پریکٹس میں کوئی الگ چیز نہیں کرتا، بس ان پہلوؤں پر کام کرتا ہوں جہاں میں کمزور ہوں۔‘‘’’میرا ایک ہی ہدف ہے کہ ہندوستان کے لیے کھیلوں اور میں قدم بہ قدم آگے بڑھنے کی کوشش کر رہا ہوں۔ ہر میچ میرے لیے اہم ہے، اس لیے میری یہی کوشش رہتی ہے کہ ہر میچ میں 100 فیصد دوں۔‘‘