شارجہ، 06 ستمبر (یو این آئی) افغانستان نے سہ رخی سیریز کے آخری لیگ میچ میں یو اے ای کو ایک سنسنی خیز مقابلے میں چار رنز سے شکست دے دی، جس کے بعد میزبان ٹیم آخر تک جیت سے محروم رہی۔ یو اے ای کو آخری اوور میں 17 رنز درکار تھے اور اس نے ابتدائی تین گیندوں پر 12 رنز بنا لیے، لیکن فرید احمد ملک نے دو ڈاٹ گیندیں پھینکیں اور آخری گیند پر آصف خان کو آؤٹ کرکے میزبان ٹیم کو مشکل میں ڈال دیا۔
171 رنز کے ہدف کے تعاقب میں عالیشان شرافو، جنہوں نے گزشتہ رات 68 رنز بنائے تھے، نے ایک شاندار چوکا لگایا۔ یو اے ای کے لیے پاور پلے بہترین ثابت ہوا کیونکہ شرافو اور محمد وسیم نے لگاتار باؤنڈری لگا کر اسکورنگ کی رفتار کو قائم رکھا۔ ابتدائی چھ اوورز میں انہوں نے چار چوکے اور تین چھکے لگائے اور اس مرحلے کے اختتام پر اسکور 54/0 تک پہنچ گیا۔ میزبان ٹیم کے لیے بدقسمتی سے نور احمد نے شرافو کو 27 رنز پر آؤٹ کرکے افغانستان کے لیے راستہ کھول دیا۔
یو اے ای کے کپتان محمد وسیم 44 اور آصف خان 40 رنز بنا کر نمایاں رہے، جب کہ افغانستان کے 5 باؤلرز نے ایک، ایک وکٹ اپنے نام کی۔
اس سے قبل افغانستان نے پہلے بلے بازی کرتے ہوئے مقررہ 20 اوورز میں 4 وکٹوں کے نقصان پر 170 رنز بنائے، سلامی بلے باز ابراھیم زدران 48، رحمٰن اللہ گرباز 40 اور کریم جنت 28 رنز بنا کر آؤٹ ہوئے، گلبدین نائب 20 رنز بنا کر ناٹ آؤٹ رہے۔
یو اے ای کی جانب سے حیدر علی نے 2، سمرنجیت سنگھ اور محمد فاروق نے ایک، ایک وکٹ اپنے نام کی۔
واضح رہے کہ ٹرائی نیشن سیریز کا فائنل مقابلہ پاکستان اور افغانستان کے درمیان 7 ستمبر کو شارجہ کرکٹ اسٹیڈیم میں کھیلا جائے گا۔
