نئی دہلی، 5 ستمبر (یو این آئی)وزیر اعظم نریندر مودی نے آن لائن گیمز میں نوجوانوں کی حد سے زیادہ مشغولیت سے پیدا شدہ خدشات کے تحت، آج یومِ اساتذہ کے موقع پر کم عمری سے ہی طلباء میں قومی فخر اور خود انحصاری کے جذبات پیدا کرنے کی ضرورت پر زور دیا۔
انہوں نے تعلیمی اداروں سے زور دے کر کہا ہے کہ وہ تکنیکی مہارت کے ساتھ ساتھ ایسی اقدار کی تعلیم بھی دیں جو ہندوستان کی ثقافتی اور اقتصادی روایات پر مبنی ہو۔ اس سلسلے میں،انہوں نے پارلیمنٹ میں حال ہی میں منظورشدہ آن لائن گیمز سے متعلق قوانین کا حوالہ دیا، جن کا مقصد طلباء اور کنبوں کوان کی لت، مالی استحصال اور پرتشدد مواد سے بچانا ہے
یوم اساتذہ کے موقع پر ایک اجتماع سے خطاب کے دوران وزیر اعظم نے اساتذہ سے کہا کہ وہ طلباء میں ان خطرات کے تیئں بیداری پیدا کریں ۔ وزیر اعظم نے طلباء اور ان کے کنبوں کی مدد کے لیے ایسی سرگرمیوں کی تجویزپیش کی جن کے ذریعے وہ اپنے گھروں میں دیسی مصنوعات کی پہچان اور ان کے استعمال کو بڑھا سکیں۔
انہوں نے کہا کہ ان سرگرمیوں سے بچوں میں دیسی مصنوعات کی اہمیت کو سمجھنے کا شعور پروان چڑھے گا اور ان میں قوم کی معیشت کے تئیں ذمہ داری کا احساس پیدا ہوگا۔
مسٹر مودی نے اسکولوں کو ہدایت دی کہ وہ ہندوستان میں تیار کردہ اشیاء کو آرٹ اینڈ کرافٹ نیز ثقافتی تقریبات میں شامل کریں۔ وزیر اعظم نے اسکولوں سے کہا کہ وہ ‘سودیشی ہفتہ’ اور ‘مقامی مصنوعات کا دن’ جیسے پروگرام شروع کریں، جہاں طلباء اپنے گھروں سے مقامی مصنوعات لائیں اور ان سے متعلق کہانیاں شیئر کریں۔
انہوں نے طلباء کی سمجھ بوجھ بڑھانے میں اس طرح کی مصنوعات کی ابتدا ، کاریگری اور قومی سطح پر ان کی اہمیت سے متعلق مباحثوں کی اہمیت پر زور دیا۔
مسٹر مودی نے کہا، ‘‘طلباء اور مقامی ہنر مندافراد کے درمیان فعال رابطہ ہونا چاہیے ، جس سے روایتی ہنر اور مینوفیکچرنگ کی ایسی مہارتوں کی پائیدار قدر اجاگرہو، جو نسل در نسل منتقل ہوتی آئی ہیں۔’’
وزیر اعظم نے یہ بھی تجویز پیش کی کہ یوم پیدائش اور دیگر مواقع پر ہندوستانی مصنوعات کو بطورِ تحفہ دئیے جانے کو فروغ دیا جائے تاکہ مقامی مصنوعات کے تئیں فخر مزیدمستحکم ہوسکے ۔
انہوں نے کہا کہ ایسی سرگرمیوں سے نوجوانوں میں حب الوطنی، خود اعتمادی اور محنت کے تئیں احترام کا جذبہ پیدا ہوگا اور ذاتی امنگیں ملک کی وسیع ترقیاتی ترجیحات کے ساتھ ہم آہنگ ہوں گی۔
وزیر اعظم نے تعلیمی برادری پر اعتماد کا اظہار کرتے ہوئے ، تعلیمی میدان میں نمایاں خدمات انجام دینے والے انعام یافتہ اساتذہ کو مبارکباد دی اور کہا کہ انہیں یقین ہے کہ اساتذہ قوم سازی کے اس مشن کو مسلسل لگن کے ساتھ آگے بڑھائیں گے ۔
۔
