اسرائیل کا غزہ شہر پر۴۰فیصد قبضے کا دعویٰ

تل ابیب/۵ستمبر
اسرائیل نے غزہ شہر پر۴۰فیصد قبضے کا دعویٰ کرتے ہوئے فلسطینیوں پر وحشیانہ حملے مزید بڑھانے کا اعلان کر دیا۔
خبر رساں ایجنسی روئٹرز کی رپورٹ کے مطابق اسرائیلی فوج کے ترجمان نے کہا کہ غزہ شہر کے۴۰فیصد حصے پر قابض ہیں۔
غزہ شہر میں اسرائیل کی وحشیانہ بمباری نے فلسطینیوں کو گھر چھوڑنے پر مجبور کیا جبکہ ہزاروں نے انخلا کی اسرائیلی دھمکی کی مخالفت کا اعلان کیا۔
غزہ کے محکمہ صحت کے حکام نے بتایا کہ جمعرات کے روز اسرائیلی حملے سے کم از کم۵۳؍افراد شہید ہوئے ، زیادہ تر حملے غزہ شہر میں کیے گئے جہاں اسرائیلی فوج نے مضافاتی علاقوں میں پیش قدمی کی اور اب وہ شہر کے مرکز سے چند کلومیٹر کے فاصلے پر ہے ۔
اسرائیلی فوج کے ترجمان بریگیڈیئر جنرل ایفی ڈیفرین نے زیتون اور شیخ رضوان علاقوں کا نام لیتے ہوئے نیوز کانفرنس میں بتایا کہ ہم فلسطینی مزاحمتی تنظیم حماس کے بنیادی ڈھانچے کو نقصان پہنچا رہے ہیں، آج ہم غزہ شہر کے ۴۰فیصد علاقے پر قابض ہیں۔
جنرل ایفی ڈیفرین نے بتایا کہ ہمارے حملے آنے والے دنوں میں مزید تیز ہوں گے ۔ انہوں نے کہا کہ ہم ہر جگہ حماس کا تعاقب جاری رکھیں گے ، یہ مشن اسی وقت ختم ہوگا جب اسرائیل کے باقی یرغمالیوں کی واپسی ہوگی اور حماس کی حکمرانی ختم ہوگی۔
جنرل ایفی ڈیفرین نے تصدیق کی کہ آرمی چیف آف اسٹاف ایال ضمیر نے کابینہ میں وزرا کو بتایا کہ انہیں غزہ میں فوجی حکمرانی نافذ کرنا ہوگی۔
وزیر اعظم نیتن یاہو کی حکومت کے انتہائی دائیں بازو کے ارکان اسرائیل پر زور دے رہے ہیں کہ وہ غزہ میں فوجی حکومت نافذ کرے اور وہاں بستیاں قائم کرے ۔
اسرائیل نے ۱۰؍اگست کو غزہ شہر میں وحشیانہ حملوں کا آغاز کیا جس کے بارے میں نیتن یاہو کا کہنا ہے کہ غزہ کے اس حصے میں حماس کے مزاحمت کاروں کو شکست دینے کا منصوبہ ہے جہاں جنگ کے ابتدائی مرحلے میں اسرائیلی فوجیوں نے سب سے زیادہ لڑائی لڑی۔